قاپشاعايدا پوليتسەيلەر سوققىعا جىققان كافە كۇزەتشىلەرى وقيعانىڭ ءمان-جايىن ايتتى - ۆيدەو
بۇل تۋرالى Tengrinews.kz ءتىلشىسى YouTube-تاعى Kapshagai Info-ارناسىندا جاريالانعان ۆيدەوعا سىلتەمە جاساپ حابارلايدى.
ەسكە سالايىق، حالىقتىڭ نارازىلىعىن تۋدىرعان وقيعا 2021 -جىلدىڭ 11-تامىزىنا قاراعان ءتۇنى بولعان. قاپشاعايداعى Del Mare ويىن-ساۋىق كەشەنىندە بىرنەشە پوليتسيا قىزمەتكەرى وسى مەكەمەنىڭ ەكى كۇزەتشىسىن ۇرىپ- سوققان. وقيعا سىرتقى بەينەباقىلاۋ كامەرالارىنا ءتۇسىپ، كەيىن كادرلار الەۋمەتتىك جەلىلەردە تارالدى.
كۇزەتشىلەردىڭ ايتۋىنشا، جانجال ويىن-ساۋىق كەشەنى قىزمەتكەرلەرى پوليتسەيلەرگە مەكەمە جابىلاتىنى تۋرالى ايتقان سوڭ باستالعان. بۇل پوليتسەيلەرگە ۇناماعان كورىنەدى. ولار بانكەتتى جالعاستىرۋدى تالاپ ەتكەن. كۇزەتشىلەر تاعى دا مەكەمەدەن كەتۋدى سۇراعاندا، پوليتسەيلەر ولاردى سىرتقا شىعارىپ، ۇرا باستاعان.
«Del Mare كافەسىندە كۇزەتشى بولىپ جۇمىس ىستەيمىن. 10-تامىزدا پوليتسيا قىزمەتكەرلەرى دەمالۋعا كەلدى. ولار ماس بولاتىن، ءبىز جابىلىپ جاتقاندىقتان كەتۋدى سۇرادىق. ولار بىزگە دورەكى سويلەدى، دالاعا شىعۋىمىزدى سۇرادى. شىققان ساتتە كۇتپەگەن جەردەن جۇدىرىق جۇمساپ، توبەلەس باستالىپ كەتتى»، - دەدى زارداپ شەككەندەردىڭ ءبىرى.
ەكىنشى كۇزەتشى سەرىكتەسى سوققىعا جىعىلعاننان كەيىن، گاز شاشقانىن ايتتى.
«توبەلەس باستالدى. كەيىن قاشىپ كەتتىك تە كۇزەت باستىعىن شاقىردىق. ول سىرتقا شىعىپ، سويلەسىپ، جاعدايدى رەتتەدى. سول جەردە ولار اۆتوماتتارىن شىعاردى، ءبارى ۆيدەودا بار»، - دەدى ەكىنشى كۇزەتشى.
سونداي-اق، كافەدە ماس كۇيدە توبەلەس شىعارعان پوليتسيا قىزمەتكەرلەرىنىڭ ءبىرى 2019 -جىلى قاپشاعاي قالاسىنداعى Samruk Holl مەيرامحاناسىندا بولعان وسىعان ۇقساس وقيعاعا قاتىسقانى بەلگىلى بولدى.
ايتا كەتەيىك، بۇعان دەيىن قاپشاعاي قالاسىنىڭ پوليتسيا قىزمەتكەرلەرى قالاداعى كافەلەردىڭ ءبىرىنىڭ كۇزەتشىلەرىمەن توبەلەسكەنى ءۇشىن جۇمىستان بوساتىلعانى حابارلانعان بولاتىن.