ەلورداداعى جاڭا مەشىتتىڭ اينالاسىنا ۇلكەن ساياباق سالىنباق
بۇل تۋرادى نۇر- سۇلتان قالاسىنىڭ اكىمى التاي كولگىنوۆ جەلىدەگى پاراقشاسىندا جازدى، دەپ حابارلايدى قازاقپارات.
«جاڭا قوعامدىق كەڭىستىك قالا تۇرعىندارى مەن قوناقتارىنىڭ تازا اۋادا ۋاقىت وتكىزۋى ءۇشىن قولايلى ورىن بولادى. ساياباق ماڭگىلىك ەل، قابانباي باتىر داڭعىلدارى مەن ساۋران، حۋسەين بەن تالال كوشەلەرىنىڭ بويىندا ورنالاسادى. ساياباقتىڭ ورتالىق اللەياسىندا ۇزىندىعى 300 مەتر سۋبۇرقاق بولادى، ونىڭ ىشىندە شاعىن ارحيتەكتۋرالىق مۇسىندەر، كولەڭكەلى شاتىرلار ورنالاسادى. جىلدان جىلعا بۇل اۋماقتى كوگالداندىرامىز. قالادا وزىندىك «جاسىل ارالدار» قۇرۋ وتە ماڭىزدى. سونداي- اق، ءوز تاراپىمىزدان ينجەنەرلىك جەلىلەر مەن كوممۋنيكاتسيالاردى تارتۋ جۇمىسىن جۇرگىزەمىز»، - دەدى اكىم.
ايتا كەتەيىك، ەلوردادا سالىنىپ جاتقان جاڭا مەشىت بۇل - ەلىمىز بەن ورتالىق ازياداعى ەڭ ۇلكەن مەشىت. نەگىزگى كۇمبەزدىڭ بيىكتىگى شامامەن 90 مەتر، ال مۇنارالار 130 مەتر بيىكتىككە كوتەرىلەدى. مەشىتتىڭ سىيىمدىلىعى - 30 مىڭ ادام.