اتا-اناسى ۆاكسينا الماعان وقۋشىلار مەكتەپكە كىرمەيدى: اقپاراتقا تۇسىنىك بەرىلدى

نۇر-سۇلتان. قازاقپارات - ەلوردا مەكتەپتەرىنىڭ ءبىرىنىڭ اتا-انالار چاتىندا ۆاكسينا الماعان اتا- انالاردىڭ بالالارى مەكتەپكە كىرگىزىلمەيتىنى تۋرالى اقپارات تارادى.

بۇعان قاتىستى قالالىق ءبىلىم باسقارماسى تۇسىنىك بەردى، دەپ حابارلايدى قازاقپارات ءتىلشىسى.

«1-قىركۇيەكتەن باستاپ بالالار مەكتەپكە بارادى. اتا- اناسى ۆاكسينا الماعان بالالاردى مەكتەپكە كىرگىزبەيدى. اتا-انالاردىڭ ءبارىن ۆاكسينا الۋعا شاقىرىڭىزدار»، - دەلىنگەن WhatsApp ارقىلى تاراعان مالىمەتتە.

نۇر-سۇلتان قالاسى ءبىلىم باسقارماسىنىڭ باسپا ءسوز قىزمەتى بۇل مالىمەتتىڭ فەيك ەكەنىن مالىمدەپ وتىر.

«نۇر-سۇلتان قالاسىندا وقۋ جىلىن ءداستۇرلى فورماتتا باستاۋ جوسپارلانۋدا. اتا-اناسى ۆاكسيناتسيا قابىلداماعان بالا 1-قىركۇيەكتە مەكتەپكە قابىلدانبايدى دەگەن شەشىم شىققان جوق»، - دەپ جاۋاپ بەردى ۆەدومستۆودان قازاقپارات ءتىلشىسىنىڭ سۇراعىنا وراي.

ەسكە سالساق، 11-تامىزدا وتكەن ۇكىمەت وتىرىسىندا پرەمەر-ءمينيسترى اسقار مامين ءبىلىم جانە عىلىم، دەنساۋلىق ساقتاۋ مينيسترلىكتەرىنە، وڭىرلەردىڭ اكىمدىكتەرىنە جاڭا وقۋ جىلىنىڭ ءداستۇرلى فورماتتا باستالاتىندىعىنا بايلانىستى ءبىرقاتار تاپسىرما بەرگەن بولاتىن. 1-قىركۇيەكتە سالتاناتتى قوڭىراۋ سوعۋ شاراسى تەك 1-سىنىپ وقۋشىلارى ءۇشىن عانا وتەدى. ال 2-11-سىنىپتار تىكەلەي بەكىتىلگەن كابينەتتەرگە بارىپ، سىنىپ ساعاتتارىنا قاتىسادى.

ءبىلىم جانە عىلىم ءمينيسترى اسحات ايماعامبەتوۆ، سونداي-اق مەكتەپتەردە ەنگىزىلگەن Ashyq قوسىمشاسى كىمدەرگە قولدانىلاتىنىن ايتتى. بارلىق ءبىلىم بەرۋ ۇيىمدارىندا قىزمەتكەرلەر مەن ءبىلىم الۋشىلار ماسكا كيۋگە مىندەتتى. مەكتەپتەردە قوسىمشا اۋىسىمدار ۇيىمداستىرىلادى، ۇزىلىستەر ۋاقىتى ءار ۋاقىتقا بەلگىلەنىپ، «1 سىنىپ - 1 كابينەت» جۇيەسى ىسكە قوسىلادى.

ال جاڭا وقۋ جىلىندا 1 وقۋشىدان كوروناۆيرۋس شىقسا بۇكىل سىنىپ قاشىقتان وقىتۋ فورماتىنا كوشىرىلەدى. 9-تامىزداعى جاعداي بويىنشا، ءبىلىم مەكەمەلەرىندەگى پەداگوگتەردىڭ 93,1 پايىزى كوروناۆيرۋسقا قارسى ۆاكسينا العان.