توكيو وليمپياداسىنىڭ جەڭىمپازدارىنا مەملەكەتتىك ناگرادالار تابىستالدى
«ارداقتى الەۋمەت، بيىلعى وليمپيادا سپورت تاريحىنداعى ايرىقشا باسەكە بولعانى انىق. بۇكىل الەم الاپات ىندەتپەن كۇرەسىپ جاتقاندا جارىستى ۇيىمداستىرۋ وڭايعا سوققان جوق. سپورتشىلاردىڭ سايىسقا دايىندىعى دا ءبىرشاما وزگەردى. وليمپيادا ۋاقىتى 1 جىلعا كەيىنگە شەگەرىلدى. وسىنداي سىندارلى ساتتە سىنعا تۇسكەن سىزدەردىڭ ەرىك-جىگەرلەرىڭىزدى ەرەكشە اتاپ وتكەن ءجون. وليمپيادانىڭ ءبىرىنشى كۇنى ەلدوس سمەتوۆ العاشقى جۇلدەنى قورجىنعا سالسا، جارىستىڭ سوڭىنا قاراي سوفيا بەرۋلسەۆا ۇلتتىق قۇرامنىڭ توكيوداعى جورىعىن تۇيىندەدى. اۋىر اتلەتتەرىمىز يگور سون مەن زۋلفيا چينشانلو، بوكسشىلارىمىز ساكەن بيبوسىنوۆ پەن قامشىبەك قوڭقابايەۆ، بالۋان نۇريسلام سانايەۆ پەن تاەكۆوندوشى دارحان ءاسادىلوۆ جانكۇيەرلەردى جۇلدەمەن قۋانتتى. سىزدەر مەملەكەتتىڭ نامىسى مەن ابىروي، مەرەيى مەن مارتەبەسىن سىنعا تۇسكەن جاھاندىق جارىستا جان اياپ قالعان جوقسىزدار. قانشا جىلدىق ەڭبەكپەن كەلگەن جۇلدەلەرىڭىز قۇتتى بولسىن»، - دەدى قىرىمبەك كوشەربايەۆ سالتاناتتى شارادا.
ايتۋلى شاراعا، مەملەكەتتىك حاتشىدان بولەك ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ، ق ر پرەمەر-ءمينيسترىنىڭ ورىنباسارى ەرالى توعجانوۆ جانە ق ر مادەنيەت جانە سپورت ءمينيسترى اقتوتى رايىمقۇلوۆا قاتىستى. مەملەكەتتىك ناگرادامەن قاتار، جەڭىمپاز سپورتشىلار مەن ولاردىڭ جاتتىقتىرۋشىلارىنا قارجىلاي سىياقى تابىستالدى. اتاپ ايتقاندا، وليمپيادا جۇلدەگەرلەرىنە 31 ميلليون تەڭگە، ال جاتتىقتىرۋشىلارعا 25 ميلليون تەڭگە كولەمىندە سىياقى تاعايىندالدى.
ايتا كەتسەك، بۇعان دەيىن مەملەكەت باسشىسىنىڭ قازاقستان رەسپۋبليكاسىنىڭ مەملەكەتتىك ناگرادالارىمەن ناگرادتاۋ تۋرالى جارلىعىنىڭ شىققانى حابارلانعان بولاتىن.
اۆتور: ءالي يبرايەۆ