ەلورداداعى سپورتتىق نىساندار تۇرعىندارعا قولجەتىمدى بولادى
ماقسات - بۇقارالىق سپورتتى دامىتىپ، جاسوسپىرىمدەر مەن جاستار اراسىندا سپورتپەن اينالىساتىن ازاماتتاردى كوبەيتۋ. بۇقارالىق سپورتتى دامىتۋدىڭ باستى ماسەلەلەرى ەلورداداعى جەڭىل اتلەتيكا كەشەنىندە تالقىلاندى. نىسان نەگىزىنەن كاسىبي سپورتشىلارعا ارنالعان. ءبىراق قىركۇيەكتەن باستاپ مۇندا سپورتقا اۋەستىگى بار كەز كەلگەن تۇرعىن كەلە الادى. قالا اكىمدىگى سوعان جاعداي جاساماق.
ول كەزدە كەشەندە كۇنىنە 750، ال ايىنا 20 مىڭ ادام شىنىعۋعا مۇمكىندىك بار.
التاي كولگىنوۆ، نۇر- سۇلتان قالاسىنىڭ اكىمى:
- قىركۇيەك ايىندا مەكتەپتەردى اشايىن دەپ جاتىرمىز. سپورت نىساندارىن اشايىن دەپ جاتىرمىز. سپورتپەن اينالىسامىن دەگەن ادامنىڭ بارىنە قولجەتىمدى بولۋى كەرەك. نەگىزگى مىندەتىمىز وسى. قوسىمشا ترەنەرلەر الامىز. جاتتىقتىرۋشىلارعا ءتيىستى جالاقىسىن بەرەمىز، قوسىمشا قاراجات بولەمىز. بۇقارالىق سپورتقا كوڭىل اۋدارۋىمىز قاجەت.
قازىر قالادا بالالار مەن جاسوسپىرىمدەردىڭ 11 سپورت مەكتەبى جۇمىس ىستەيدى. ولاردا 8 مىڭنان استام جەتكىنشەك شىنىعادى. الداعى ۋاقىتتا ولارعا قوسىمشا قارجى ءبولۋ ارقىلى جاتتىعۋعا كەلەتىن جاسوسپىرىمدەر سانىن % 50- كە كوبەيتپەك. بۇعان قوسا اۋلا كلۋبتارىنىڭ سانىن 30-دان 50-گە جەتكىزۋ جوسپارلانعان. سوندا سپورتپەن شۇعىلداناتىن بالار سانى دا ەكى ەسە ارتادى.
باۋىرجان ساحاربايەۆ، «№ 2 بالالار مەن جاسوسپىرىمدەردىڭ مامانداندىرىلعان سپورت مەكتەبى» ك م م باسشىسى:
- قوسىمشا قارجى تارتىپ، جاتتىقتىرۋشىلاردى شاقىرۋ ارقىلى مەكتەپ جانىنداعى سپورتتىڭ سەكسيالاردى دامىتۋعا بولار ەدى. سول كەزدە بالا تۇسكە دەيىن ساباعىن وقيدى، تۇستەن كەيىن جاتتىعۋىنا قاتىسادى. ماسەلەن قازىر ءاربىر مەكتەپتە شامامەن 2,5 مىڭداي بالا وقيدى. ولار سپورتتىق ۇيىرمەگە بارۋ ءۇشىن مەكتەپتەن ۇزاپ كەتەدى. بيىل بۇقارالىق سپورتتى دامىتۋ ءۇشىن ەلوردا جاستارى باعدارلاماسىنا دا ارنايى ءبولىم قوسىلدى. سونىڭ اياسىندا قارجى ءبولىنىپ، جاس جاتتىقتىرۋشىلارعا الەۋمەتتىك قولداۋ جاسالادى.
سونداي- اق اۋلالاردى اباتتاندىرۋ كەزىندە سپورتتىق نىساندارعا باسىمدىق بەرىلىپ، اشىق اسپان استىنداعى جاتتىعۋ الاڭدارىن كوبەيتۋ جۇمىستارى جالعاسادى.