قىزىلوردا جۇرتشىلىعى قامشىبەك قوڭقابايەۆقا كولىك مىنگىزدى
بۇگىن وبلىس اكىمى گۇلشارا ءابدىقالىقوۆا توكيو وليمپياداسىنا قاتىسقان قىزىلوردالىق سپورتشىلار قامشىبەك قوڭقابايەۆ، داۋلەت نيازبەكوۆ جانە ءمولدىر جاڭبىربايمەن جۇزدەستى. ايماق باسشىسى قولا جۇلدەگەر قامشىبەك قوڭقابايەۆتى جانە ءدۇبىرلى دودادا ەل نامىسىن ابىرويمەن قورعاعان داۋلەت نيازبەكوۆ جانە ءمولدىر جاڭبىربايعا العىسىن ءبىلدىردى. سپورتشىلاردىڭ جەڭىسى ەل تاۋەلسىزدىگىنە ۇلكەن تارتۋ بولعانىن اتاپ ءوتتى.
«ەكى اپتا بويى وزدەرىڭە جانكۇيەر بولدىق. قامشىبەكتىڭ التىنعا بەرگىسىز قولا جۇلدەسى ەلدىڭ كوڭىلىن كوتەردى. تالاي ءبۇلدىرشىننىڭ قيالىنا قانات ءبىتىردى. ەل پرەزيدەنتىنەن مەملەكەتتىك تۋدى الۋ - قاشاندا ۇلكەن مارتەبە، زور سەنىم! بۇل مىندەتتى جەرلەسىمىز قامشىبەك قوڭقابايەۆ ابىرويمەن اقتاپ، بايراعىمىزدى وليمپيادا تورىندە جەلبىرەتتى»، - دەدى وبلىس اكىمى.
بيىل سىر سپورتشىلارى تولايىم تابىستارعا قول جەتكىزۋدە. جىل باسىنان جەرلەستەرىمىز ەل بىرىنشىلىكتەرىندە 700 مەدال جەڭىپ السا، الەم، ازيا چەمپيوناتتارىندا 46 مەدالعا قول جەتكىزدى. كەزدەسۋدە وبلىس اكىمى گۇلشارا ءابدىقالىقوۆا ەل نامىسىن ابىرويمەن قورعاپ شىققان قامشىبەك قوڭقابايەۆقا «Toyota Camry 75» اۆتوكولىگىنىڭ كىلتىن تابىس ەتتى.
ال وليمپيادا ويىندارىنىڭ قاتىسۋشىلارى داۋلەت نيازبەكوۆ، ءمولدىر جاڭبىربايعا جانە قامشىبەك قوڭقابايەۆتىڭ باپكەرى سەيىتجان توكەنوۆكە 1 ميلليون تەڭگەنىڭ سەرتيفيكاتى بەرىلدى.
ەلدىڭ رۋحى مەن مارتەبەسىن كوتەرگەن سپورتشىلارعا «Dalatex» ج ش س- ءنىڭ باسشىسى ديماش ابىشيەۆ، «نۇرلەن» ج ش س- ءنىڭ باسشىسى قايرات بورانبايەۆ، «مەليوراتور» ج ش س- ءنىڭ باسشىسى بەردىبەك مىحانوۆ جانە «ستاندارت ويل كزو» ج ش س- ءنىڭ باسشىسى ءادىل بيجانوۆ دەمەۋشىلىك كورسەتتى. سونداي- اق، جيىندا اۋىر اتلەتيكادان 4 دۇركىن الەم چەمپيونى، ق ر ەڭبەك سىڭىرگەن سپورت شەبەرى يليا يلين قامشىبەكتى جەڭىسىمەن قۇتتىقتادى. ال ءمولدىر مەن داۋلەتكە الداعى سايىستاردا ساتتىلىك تىلەدى.
ەسكە سالساق، ءدۇبىرلى دوداعا قازاقستان اتىنان 97 سپورتشى سپورتتىڭ 28 تۇرىنەن باق سىنادى. قازاقستان سپورتشىلارى سەگىز قولا مەدال الدى. ولاردىڭ قاتارىندا دزيۋدوشى ەلدوس سمەتوۆ، اۋىر اتلەتتەر يگور سون مەن زۋلفيا چينشانلو، بوكسشىلار قامشىبەك قوڭقابايەۆ، ساكەن بيبوسىنوۆ، پالۋان نۇريسلام سانايەۆ پەن كاراتەشى دارحان ءاسادىلوۆ پەن سوفيا بەرۋلتسيەۆا بار.