الماتىدا التى جولاقتى باسسەين سالىنىپ جاتىر
الماتى اكىمى سپورت نىساندارىنىڭ قۇرىلىس بارىسىمەن تانىسقان كەزدە ولاردىڭ ماتەريالدىق- تەحنيكالىق جابدىقتالۋىنا جانە تۇرعىندار ءۇشىن قولجەتىمدى بولۋىنا ەرەكشە نازار اۋداردى.
بۇقارالىق سپورتتى دامىتۋ جانە مەگاپوليستە كاسىبي سپورت كوماندالارىن دايىنداۋ ماقساتىندا سپورتتىق ينفراقۇرىلىم بەلسەندى تۇردە جاڭارتىلىپ، نىعايتىلىپ جاتىر. ورتالىق مادەنيەت جانە دەمالىس ساياباعىندا الماتى ۆەلوسپورت فەدەراتسياسىنىڭ قارجىسى ەسەبىنەن سپورتتىڭ وسى ءتۇرىن تانىمال ەتۋ ماقساتىندا ۆەلوترەكتىڭ ينفراقۇرىلىمى مودەرنيزاتسيالانىپ جاتىر.
جاڭارتىلعان ۆەلوترەك بالالار مەن جاسوسىپىرىمدەردىڭ جانە كاسىبي سپورتتىڭ دامۋىن جاڭا دەڭگەيگە كوتەرەدى، Almaty Cycling Team قۇرلىقتىق ۆەلوكوماندانىڭ دايىندىعىن كۇشەيتەدى. سونىمەن قاتار، بارلىق حالىقارالىق تالاپتارعا ساي ۆەلوترەك مەگاپوليستە وتەتىن جارىستاردىڭ كۇنتىزبەسىن كەڭەيتۋگە مۇمكىندىك بەرەدى. باقىتجان ساعىنتايەۆ بەيىمدەۋ- جاتتىعۋ ورتالىعى، سپورت زالى مەن جابىق باسسەين سالىنىپ جاتقان «حالىقارالىق شاڭعى ترامپليندەرى كەشەنى» II كەزەڭىن ىسكە قوسۋ بارىسىمەن تانىستى.
امبەباپ جاتتىعۋ زالى 580 ورىنعا ەسەپتەلگەن جانە كۇرەس، فۋتبول، ۆولەيبول، باسكەتبول جانە باسقا سپورت تۇرلەرىنە ارنالعان. 6 جولاقتى 25 تە 16 شاقىرىم بولاتىن جابىق ءجۇزۋ باسسەينى جارتىلاي وليمپيادالىق قاشىقتىققا ەسەپتەلگەن. مۇندا سپورت زال دا قاراستىرىلعان. نىسان كۇزدە پايدالانۋعا بەرىلەدى. بوستاندىق اۋدانىندا، گاگارين ساياباعىنىڭ سولتۇستىگىنە قاراي Champion جەكە قورىنىڭ قولداۋىمەن، قازىرگى زامانعى سپورت كەشەنىنىڭ قۇرىلىسى باستالدى، وندا مۇمكىندىگى شەكتەۋلى ادامدار دا جاتتىعۋلار جاساي الادى. اياقتالۋى كەلەسى جىلعا جوسپارلانعان.
بۇگىندە الماتىدا 3400 گە جۋىق سپورت نىسانى، ونىڭ ىشىندە 12 ستاديون، سپورت سارايى، 14 سپورت كەشەنى مەن 12 سپورت عيماراتى. سونىمەن قاتار مەگاپوليستە قۇراما كوماندالاردىڭ 5 جاتتىعۋ ورتالىعى، 3 شاڭعى بازاسى، 12 اتۋ ءتيرى، اتۋ الاڭى، ۆەلوترەك، سەكىرۋ ءترامپلينى، 6 حوككەي كورتى جانە كونكيمەن جۇگىرۋ ستاديونى بار. 2671 تەگىس قۇرىلىمدار، 102 تەننيس كورتى، يپپودروم، 10 سپورت مانەجى، 51 باسسەين، 483 سپورت زالى، 12 كىرىكتىرىلگەن سپورت زالى بار. الماتىداعى جابىق سپورت عيماراتتارىنىڭ جالپى الاڭى 81503 شارشى مەتر. بيىل ولاردى جەرگىلىكتى بيۋدجەت ەسەبىنەن كوبەيتۋ ءۇشىن قالا شەتىندە جالپى الاڭى 38 مىڭ شارشى مەتر بولاتىن 6 دەنە شىنىقتىرۋ- ساۋىقتىرۋ كەشەنى مەن تەننيس ورتالىعى سالىنادى.
جالپى وتكىزۋ قابىلەتى تاۋلىگىنە 5250 ادام. سپورتتىق سەكتسيالار سانى - 150. بيۋدجەتتەن تىس قارجى ەسەبىنەن 6 جاڭا سپورت نىسانىن، ونىڭ ىشىندە دسك، ۇستەل تەننيسى ورتالىعىن، تەننيس ورتالىعىن، كۇرەس كەشەنىن، «سۇڭقار» گيمناستيكا زالى مەن سپورت كەشەنىن سالۋ جوسپاردا. سپورتتىڭ 15 تۇرىنەن 70-تەن استام سپورت سەكتسيالارى اشىلاتىن بولادى. جۇمىس ساپارىنىڭ سوڭىندا قالا اكىمى «دۋمان» شاعىن اۋدانىنداعى جولداردى كۇردەلى جوندەۋ جۇمىستارىنىڭ بارىسىمەن تانىستى.
ۇزىندىعى 13,4 شاقىرىم بولاتىن 29 كوشەدەگى كۇردەلى جوندەۋ جۇمىستارى اياقتالدى، اسفالتبەتون جامىلعىسى توسەلىپ، ارىق جەلىلەرى مەن تروتۋارلار جاسالدى. ۇزىندىعى 14 شاقىرىم بولاتىن قالعان 24 كوشەگە اسفالت توسەۋ جۇمىستارى جۇرگىزىلۋدە، اياقتالۋى كۇزگە جوسپارلانعان.