كارانتين تالابىن بۇزعان بۇركىتكە ايىپپۇل سالىندى

الماتى. قازاقپارات - الماتىدا بۋرگەر ورتالىعىنىڭ اشىلۋىنا قاتىسقان جۇلدىزدارعا ايىپپۇل سالىندى، دەپ حابارلايدى قازاقپارات ءتىلشىسى.

8 - تامىز كۇنى Royal Tulip Almaty قوناقۇيىندە كوپتەگەن قازاقستاندىق جۇلدىزداردىڭ قاتىسۋىمەن Black Star Burger ورتالىعىنىڭ اشىلۋى ءوتتى.

الماتى قالاسى سانيتارلىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ءسادۋاقاس بايعابۇلوۆ اتاپ وتكەندەي، ويىن- ساۋىق مەكەمەلەرىنىڭ يەلەرى اكىمشىلىك جاۋاپكەرشىلىكتەن جانە ءىرى ايىپپۇلداردان سىتىلىپ كەتۋ ءۇشىن جەكە ادامدارعا نەمەسە ءارتۇرلى جەكە كاسىپكەرلەرگە بۇل ورىنداردى جالعا بەرەدى.

«Royal Tulip Almaty قوناقۇيىندە شەكتەۋ جانە كارانتيندىك تالاپتاردى بۇزۋ فاكتىسى بويىنشا اكىمشىلىك ءوندىرىستى قاراۋ بارىسىندا مىنالار انىقتالدى: شەكتەۋلى كارانتيندىك تالاپتاردىڭ بۇزىلۋىن ۇيىمداستىرۋشى - ج ك كۋلتاسوۆ ە. م. Royal Tulip Almaty ول ازاماتقا كەلىسىم بويىنشا جازدىق الاڭشاسىن جالعا بەرگەن»، - دەدى ءسادۋاقاس بايعابۇلوۆ.

جەكە كاسىپكەرگە «حالىقتىڭ سانيتارلىق - ەپيدەميولوگيالىق سالاۋاتتىلىعى سالاسىنداعى زاڭناما تالاپتارىن، سونداي- اق گيگيەنالىق نورمالاردى بۇزۋ» بويىنشا حاتتاما تولتىرىلىپ، شارا قولدانىلدى. ايىپپۇل 230 اەك- ءتى (670 مىڭ تەڭگە) قۇراۋى مۇمكىن. سونىمەن قاتار، ول شاراعا قاتىسقان ءانشى لۋينا مەن ونىڭ جۇبايىنا، ءانشى بۇركىتكە 30 اەك (شامامەن 87 مىڭ تەڭگە) كولەمىندە حاتتاما تولتىرىلعانىن ءمالىم ەتتى.

«مەدەۋ اۋداندىق پوليتسيا باسقارماسىنىڭ قىزمەتكەرلەرى ءىس- شارانىڭ قالعان قاتىسۋشىلارىنا مونيتورينگتىك توپ شەڭبەرىندە ءتيىستى جۇمىستار جۇرگىزىپ جاتىر، ولارعا دا اكىمشىلىك شارالار قابىلدانىلادى»، - دەدى دەپارتامەنت باسشىسىنىڭ ورىنباسارى ءسادۋاقاس بايعابىلوۆ.

اۆتور: الما مۇقانوۆا