اسحات ايماعامبەتوۆ: قاشىقتان وقىتۋ كەزىندەگى كەمشىلىكتەر ورنىن تولتىرۋ ءۇشىن كەشەندى جۇمىس جۇرگىزىلەدى

نۇر-سۇلتان. قازاقپارات - قاشىقتان وقىتۋ كەزىندەگى ءبىلىم ساپاسى كەمشىلىكتەرىنىڭ ورنىن تولتىرۋ ءۇشىن كەشەندى جۇمىس جۇرگىزىلەدى.

بۇل تۋرالى بۇگىن ۇكىمەت وتىرىسىندا ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

«تاعى ءبىر ماڭىزدى باعىت - وقۋ پروتسەسىن بەيىمدەۋ. ءبىز جاڭا وقۋ جىلىن ءداستۇرلى فورماتتا باستاعانمەن قاشىقتان وقىتۋ كەزىندەگى ءبىلىم ساپاسى كەمشىلىكتەرىنىڭ ورنىن تولتىرۋ ءۇشىن كەشەندى جۇمىس جۇرگىزۋىمىز قاجەت. وسى ماقساتتا كەشەندى، جۇيەلى ءىس- شارالاردى جۇزەگە اسىراتىن بولامىز. حالىقارالىق تاجىريبەدە جۇرگىزىلگەن قاشىقتان وقىتۋدىڭ ناتيجەسى دە زەرتتەلدى. سوعان سايكەس وقۋ جىلىندا نەگىزگى پاندەر بويىنشا بىلتىرعى قيىن تاقىرىپتارعا كوبىرەك ساعات ءبولىنىپ، وقۋ باعدارلامالارىن تۇزەتۋگە، ناشار ۇلگەرەتىن بالالارمەن قوسىمشا جۇمىسقا باسا نازار اۋدارىلادى»، - دەدى اسحات ايماعامبەتوۆ.

ونىڭ اتاپ وتۋىنشە، پەداگوگتارعا سيفرلىق قۇزىرەتتىلىكتەرىن ارتتىرۋ ءۇشىن ونلاين كۋرستار دايىندالدى. 2-تامىزدان باستاپ مۇعالىمدەر كۋرستان وتە باستادى.

«ساباقتىڭ ۇزاقتىعى 45 مينۋت بولىپ، كۇندەلىكتى باعالاۋ جۇيەسى ءارى قاراي جالعاسادى. بيىل 25-مامىردان 19-ماۋسىمعا دەيىن ۇيىمداستىرىلعان جازعى مەكتەپ تاجىريبەسى نەگىزىندە كەلەسى وقۋ جىلىندا دا 4 اپتالىق جازعى مەكتەپ ۇيىمداستىرۋ بويىنشا شەشىم قابىلداندى»، - دەدى مينيستر.

اۆتور: مارلان جيەمباي