اسحات ايماعامبەتوۆ وقۋشىلار بيىل قانداي فورماتتا ءبىلىم الاتىنىن جاريالادى

نۇر-سۇلتان. قازاقپارات - بۇگىن ۇكىمەت وتىرىسىندا ق ر ءبىلىم جانە عىلىم ءمينيسترى اسحات ايماعامبەتوۆ وقۋشىلار جاڭا وقۋ جىلىندا قانداي فورماتتا ءبىلىم الاتىنىن ايتتى، دەپ حابارلايدى قازاقپارات ءتىلشىسى.

«جۇمىسكەرلەردىڭ ۆاكسينا الۋى دا ەرەكشە ماڭىزعا يە بولىپ، بۇل جۇمىس ارى قاراي جالعاستىرىلادى. بۇعان قوسا مەكتەپتەردە قوسىمشا اۋىسىمدار ۇيىمداستىرىلىپ، ۇزىلىستەر ۋاقىتىن ءار ۋاقىتقا بەلگىلەپ، «1-سىنىپ - 1 كابينەت» جۇيەسى جۇمىس جاسايدى. بارلىق بۇقارالىق ءىس-شارالارعا تىيىم سالىنادى»، - دەدى اسحات ايماعامبەتوۆ.

ونىڭ اتاپ وتۋىنشە، جوعارىدا اتالعان شەكتەۋلەردى ساقتاي وتىرىپ، بالاباقشالارداعى 20-25 بالادان اسپايتىن توپتارعا شتاتتىق رەجيمدە جۇمىس ىستەۋ ۇسىنىلادى. ءوز كەزەگىندە مەكتەپتەر بارلىق 1 مەن 11-سىنىپ وقۋشىلارىنا قاتاڭ سانيتارلىق شەكتەۋلەردى ساقتاي وتىرىپ، وقىتۋدى ءداستۇرلى فورماتتا جۇرگىزۋ، كوللەدجدەر مەن جوعارى وقۋ ورىندارىنىڭ ستۋدەنتتەرىن دە ءداستۇرلى فورماتتا وقىتۋ ۇسىنىلادى.

«ارينە، اتا-انالارى نەمەسە وزدەرى كوروناۆيرۋسپەن اۋىراتىن جانە دەنساۋلىعى بويىنشا تاۋەكەل توپتارعا جاتاتىن ءبىلىم الۋشىلارعا ۋاقىتشا قاشىقتان وقىتۋ فورماتىمەن ءبىلىم الۋدى ۇيىمداستىرامىز»، - دەدى مينيستر.