ع. كەنجەبايەۆ: ءبىراز بوكسشى ۇلتتىق قۇرامادان كەتەدى
ونىڭ ايتۋىنشا، ەلدە مىقتى رەزەرۆ بار. ەندى سولاردىڭ الەۋەتىن پايدالانۋ كەرەك. ال، قۇرامادا جۇرگەن جىگىتتەردىڭ كەيبىرى كاسىپقوي مانسابىن اياقتايدى.
«كەيبىرى كاسىپقوي بوكسقا اۋىسادى»، دەيدى. ۇلتتىق قۇراما جازعى ويىنداردان 1 التىن، 1 كۇمىس جانە 1 قولا الۋدى جوسپارلاپتى. ءبىراق ءۇمىت ارتقان جىگىتتەر العاشقى اينالىمداردان ۇشتى.
«وسى تۇرعىدا تورەشىلەردىڭ جۇمىسىنا دا ءبىراز سۇراق بار»، دەيدى. سەبەبى، ولار كومپيۋتەرلىك تەحنولوگيا بويىنشا كەزدەيسوق تاڭدالدى. كەيبىرى دايىندىقسىز كەلدى. ءتىپتى اعىلشىن ءتىلىن بىلمەيتىندەرى دە بار. سونىڭ سالدارىنان ءارتۇرلى كەلەڭسىزدىكتەر ورىن الىپ جاتتى.
«قالاي بولعاندا دا ەندى ەستى جيناپ، قاتەلىكتەردى تۇزەپ، الداعى وليمپياداعا دۇرىستاپ دايىندالۋ كەرەك»، - دەيدى باس باپكەر.
عالىمبەك كەنجەبايەۆ، بوكستان ۇلتتىق قۇرامانىڭ باس باپكەرى:
- قازىر ەلىمىزدە بوكستىڭ رەزەرۆى مىقتى. وليمپياداعا بارا الماي قالعان جىگىتتەر بار. ولار 2024 -جىلى وتەتىن پاريج ويىندارىندا جارقىرايتىن بولادى. توكيودان كەيىن قۇراماداعى سپورتشىلاردىڭ ءبىرازى كەتەدى. جالپى العاندا بۋىن الماسۋ پروتسەسى بولادى. وسى رەتتە جاستاردىڭ تاجىريبە جيناقتاپ، كەلەسى ءتورت جىلدىققا جاقسى دايىندىقپەن بارۋىنا مۇمكىندىكتەرى بار. قۇلدىراۋدان كەيىن ءالى- اق بيىككە كوتەرىلەمىز.