وليمپيادا جۇلدەگەرى ساكەن بيبوسىنوۆتى جەرلەستەرى قوشەمەتپەن كۇتىپ الىپ، كولىك مىنگىزدى - فوتو
توكيو تورىندە وتكەن دودادا الەمنىڭ ەڭ ۇزدىك بوكسشىلارىمەن تايتالاسىپ، الاشتىڭ مەرەيىن اسىرعان جەرلەسىمىزدى وبلىس اكىمى ءومىرزاق شوكەيەۆ، تۇركىستان جاستارى، سپورتشىنىڭ ارىپتەستەرى، تۋعان- تۋىستارى مەن دوستارى قارسى الدى. قازاقستاننىڭ ابىرويىن اسقاقتاتقان بوكسشىعا تۇركىستان وبلىسىنىڭ كاسىپكەرلەرى تەمىر تۇلپار مىنگىزدى.
«تۇركىستان وبلىسىنىڭ تاريحىندا العاشقى وليمپيادا مەدالىن ۇتىپ العان ساكەن ءوزىن ۇزدىك سپورتشى ەكەنىن كورسەتەدى. وعان بارلىعىمىز جانكۇيەر بولدىق، كۋا بولدىق. بۇل التىنعا بەرگىسىز قولا جۇلدە بولدى. بىزگە ۇلكەن مارتەبە. تۇركىستان وبلىسىنىڭ بارلىق سپورتشىلارىنا جەڭىس تۇعىرىنان كورىنۋگە تىلەكتەسپىز»، - دەدى وبلىس اكىمى.
بوكستان توكيو وليمپياداسىندا 52 كەلى سالماق دارەجەسىندە سىنعا تۇسكەن 24 جاستاعى سپورتشى جارتىلاي فينالدىق جەكپە-جەكتە ۇلى بريتانيا سپورتشىسى گالال يافايمەن كەزدەسىپ، وليمپيادانىڭ قولا جۇلدەگەرى اتاندى.
«مەنى قولداعان بارشا قازاق ەلىنە، حالقىما شەكسىز العىسىمدى ايتامىن. ارينە، نەگىزگى ماقساتىمىز التىن بولعان. بۇيىرعانى وسى بولدى. اللاعا شۇكىر دەيمىن. قازاقتىڭ اتىن الەمگە تانىتۋ ءۇشىن الداعى ۋاقىتتا دا بار كۇش- جىگەرىمدى سالۋعا ۋادە بەرەمىن»، - دەدى توكيو وليمپياداسىنىڭ قولا جۇلدەگەرى ساكەن بيبوسىنوۆ.
ساكەن بيبوسىنوۆ - تۇركىستان وبلىسى، سايرام اۋدانىنىڭ تۇرعىنى. وتباسىنداعى ءۇش ۇلدىڭ كەنجەسى. جاسىنان سپورتقا جاقىن بولعان. الدىمەن فۋتبولمەن شۇعىلدانىپ، كەيىن ۇلكەن اعاسىنىڭ ارتىنان ەرىپ، بوكسقا كەلگەن. ۇلتتىق قۇراما مۇشەسى. الەم چەمپيوناتى مەن ازيا چەمپيوناتىنىڭ قولا جۇلدەگەرى. وتانداسىمىز توكيو تورىندە 4 كەزدەسۋ وتكىزدى. ول پۋەرتو-ريكا، فرانسيا، يسپانيا بوكسشىلارىن جەڭدى. جالپى تۇركىستان وبلىسىنان توكيو وليمپياداسىنا 5 سپورتشى اتتانعان بولاتىن. سونىڭ ءبىرى - ساكەن بيبوسىنوۆ قولا مەدالگە يە بولىپ، سەنىمدى اقتادى.