اۋعانستاننىڭ تاجىكستانمەن شەكاراداعى پروۆينسياسىن تالىبتەر باسىپ الدى

كابۋل. قازاقپارات - جەكسەنبى كۇنى «تاليبان» قوزعالىسى تاجىكستانمەن شەكارادا ورنالاسقان تاحار پروۆينسياسىنىڭ اكىمشىلىك ورتالىعى - تالۋكان قالاسىن باسىپ العاندىعى جونىندە مالىمدەدى. قازاقپارات بۇل تۋرالى «انادولى» اگەنتتىگىنە سىلتەمە جاساپ حابارلايدى.

اگەنتتىككە تاحار پروۆينسياسىنىڭ زاڭنامالىق ورگانى ءتوراعاسىنىڭ ورىنباسارى رۋحوللا راۋفي ءمالىم ەتكەندەي، قاۋىپسىزدىك كۇشتەرىنىڭ قىزمەتكەرلەرى مەن جەرگىلىكتى بيلىك وكىلدەرى فارحار ۋەزىنە كوشكەن.

ونىڭ ايتۋىنشا، تالىبتەر بارلىق قوعامدىق ورىندارعا باسا كوكتەپ كىرگەن. سونداي-اق جەرگىلىكتى تۇرمەدەن سوتتالعانداردى بوساتقان. ر. راۋفيدىڭ سوزىنشە، سودىرلار تالۋكانعا شابۋىل جاساي باستاعانىنا ەكى اپتاعا جۋىقتاعان. «تاليبان» قوزعالىسىنىڭ مالىمەتىنە سايكەس، ولار تالۋكانداعى بارلىق قوعامدىق عيماراتتى ءوز قاراماعىنا العان.

وسىلايشا، «تاليبان» باسىپ العان اۋعان پروۆينسيالارىنىڭ اكىمشىلىك ورتالىقتارىنىڭ سانى 5 كە جەتتى. بۇعان دەيىن «تاليبان» ساري-پۋل جانە كۋندۋز پروۆينسيالارىنىڭ اكىمشىلىك ورتالىقتارىن باسىپ العان بولاتىن. ال ءبىر كۇن بۇرىن تالىبتەر ەلدىڭ سولتۇستىگىندەگى دجۋزكان پروۆينسياسىنىڭ استاناسى - شيبيرگان قالاسىنا كىردى.

«تاليبان» قوزعالىسى اۋعانستان اۋماعىنىڭ 80 پايىزىن باقىلاۋعا العانىن ايتۋدا. ب ۇ ۇ مالىمەتىنشە، سوڭعى ءبىر ايدا تالىبتەردىڭ شابۋىلى سالدارىنان اۋعانستاننىڭ 1 مىڭنان استام بەيبىت حالقى قازا بولدى.