جەلىدە تاعى دا قالالاردىڭ توبەسىنەن ۆيرۋس شاشاتىن تىكۇشاق جايلى فەيك تارادى

نۇر-سۇلتان. قازاقپارات - الەۋمەتتىك جەلىدە «اقتاۋ ۇستىنەن تىكۇشاقتار ۆيرۋس شاشادى» دەگەن حابارلاما جاريالاندى.

بۇل تەوريانى ق ر قورعانىس مينيسترلىگى جوققا شىعاردى، دەپ حابارلايدى Stopfake.kz.

ۆەدومستۆونىڭ حابارلاۋىنشا، تىكۇشاقتار وقۋ-جاتتىعۋعا جۇمىلدىرىلدى. ولار ۆيرۋس تا، ۋلى حيميكاتتار دا شاشقان جوق.

- اسكەري دايارلىق جوسپارىنا سايكەس، اپتاسىنا بىرنەشە رەت بارلىق اۆياتسيالىق بازالاردا ۇشۋ داعدىلارى مەن كاسىبي شەبەرلىك دەڭگەيدى قولداۋعا باعىتتالعان وقۋ-جاتتىعۋ ۇشۋلارى وتكىزىلەدى. ۇشۋلار تاڭەرتەڭ ەرتە باستالادى جانە اۋا تەمپەراتۋراسى +35 گرادۋستان جوعارى كوتەرىلگەندە اياقتالادى. سونداي-اق ۇشۋ قۇرامىن دايارلاۋ باعدارلاماسىندا تۇنگى ۇشۋلار قاراستىرىلعان. اۋەجاي اقتاۋ قالاسىنا تىكەلەي جاقىن ورنالاسقاندىقتان، ۇشۋ مارشرۋتىنىڭ ءبىر بولىگى قالا اۋداندارىنا جاقىن ورنالاسقان، - دەلىنگەن مينيسترلىكتىڭ رەسمي جاۋابىندا.

سونداي-اق، اسكەري ۇشاقتار مەن تىكۇشاقتار قانداي دا بولماسىن سۇيىقتىق شاشۋ ءۇشىن قاجەتتى ارنايى اسپالى جۇيەمەن جابدىقتالماعان. ق ر ق ك ا ق ك ا ا ك يەلىگىندە بار اسپالى جۇيەلەر تەك قانا سۋمەن تولتىرۋعا ارنالعان جانە ولارعا باسقا سۇيىقتىقتاردى قۇيۋ مۇمكىن ەمەس. بۇل جۇيەلەر ءورت ءسوندىرۋ كەزىندە قول جەتپەيتىن جەرلەردە دالا، ورمان ورتتەرىن ءسوندىرۋ ءۇشىن قولدانىلادى. ۇشاقتار مەن تىكۇشاقتاردان ۋ شاشۋ تەورياسى قاستاندىق تەورياسىن جاقتاۋشىلار اراسىندا كەڭىنەن تارالعان. الايدا جىلدار بويى وعان راستاۋ تابىلعان جوق.