ارىس قالاسىندا فوسفور تيەلگەن ۆاگوندار ورتەندى: تۇرعىندار ەۆاكۋاتسيالانۋدا
توتەنشە وقيعانىڭ ءمان- جايىن تۇركىستان وبلىسى اكىمىنىڭ ورىنباسارى ساكەن قالقامانوۆ Facebook-پاراقشاسىندا ءتۇسىندىرىپ جازدى.
«بۇگىن، كەشكى ساعات التى جارىم شاماسىندا ارىس ستانتسياسىندا جامبىل وبلىسىنان رەسەيگە فوسفور تيەپ جونەلتىلگەن ەكى كونتەينەر وتقا وراندى. اۋدان مەن وبلىستىڭ بارلىق توتەنشە كۇشتەرى جۇمىلدىرىلدى. مۇنداي ءورتتى قالاي ءسوندىرۋ كەرەكتىگىن ماماندار جاقسى بىلەدى. الايدا، سارى فوسفور وتە ۇزاق ۋاقىت جانىپ جاتىپ الادى جانە ءتۇتىنى قويۋ بولادى. جەلدىڭ باعىتى وزگەرگەن جاعدايدا، تۇيىققا جاقىن ورنالاسقان شاعىن اۋدان تۇرعىندارىنىڭ دەنساۋلىعىنا زيان كەلمەس ءۇشىن اۋدان اكىمدىگى حالىقتى قاۋىپسىز جەرگە كوشىرىپ جاتىر. كوشىرىلگەن تۇرعىنداردىڭ ءبارى قالا مەكتەپتەرىنىڭ بىرىندە تۇنەيدى. ولار ىستىق تاماقپەن قامتاماسىز ەتىلەدى. جاعداي باقىلاۋدا. مەن ءوزىم وقيعا ورنىنا شىقتىم»، - دەپ جازدى وبلىس اكىمىنىڭ ورىنباسارى.
بۇعان دەيىن تۇركىستان وبلىسى توتەنشە جاعدايلار دەپارتامەنتى تاراتقان مالىمەت بويىنشا، ءورت باسقا پويىزداردىڭ قوزعالىسىنا اسەر ەتپەگەن. وتقان ورانعان ۆاگون پويىزدان اجىراتىلىپ، تەمىرجول تورابىنان شەتكەرى شىعارىلعان.
اۆتور: ەسىمجان ناقتىباي