نيكول پاشينيان ارمەنيانىڭ پرەمەر- ءمينيسترى بولىپ تاعايىندالدى
پرەزيدەنتتىڭ جارلىعى كونستيتۋتسيالىق تالاپقا نەگىزدەلگەن، وعان سايكەس رەسپۋبليكا ۇكىمەتىنىڭ باسشىسى بولىپ پارلامەنتتىك كوپشىلىك ۇسىنعان كانديدات تاعايىندالادى، دەپ حابارلايدى قازاقپارات مەنشىكتى ءتىلشىسى.
2 - تامىزدا كەزەكتەن تىس پارلامەنت سايلاۋىنىڭ قورىتىندىسى بويىنشا قۇرىلعان 8- شاقىرىلىمنىڭ ۇلتتىق جيىنىنىڭ ءبىرىنشى وتىرىسى ءوتىپ جاتىر. پارلامەنتتىك كوپشىلىكتى قۇرايتىن «گراجدانسكيي دوگوۆور» پارلامەنتتىك فراكسياسى پرەمەر- مينيستر كانديداتۋراسىنا ءوزىنىڭ كوشباسشىسى - نيكول پاشينياندى ۇسىندى.
قولدانىستاعى كونستيتۋتسياعا سايكەس، ەل پرەزيدەنتى جاڭادان سايلانعان ۇلتتىق جيىننىڭ وكىلەتتىك مەرزىمى باستالىسىمەن پرەمەر- مينيستر رەتىندە پارلامەنتتىك كوپشىلىك ۇسىنعان كانديداتتى تاعايىندايدى.
«كونستيتۋتسيانىڭ 149-بابىنىڭ 1-بولىگىن نەگىزگە الا وتىرىپ، نيكول پاشينيان پرەمەر- مينيستر بولىپ تاعايىندالسىن»، - دەلىنگەن ارمەنيا پرەزيدەنتى جارلىعىنىڭ ماتىنىندە.
ەسكە سالا كەتەيىك، ارمەنيادا 20- ماۋسىمدا كەزەكتەن تىس پارلامەنتتىك سايلاۋ ءوتتى. سايلاۋدا «گراجدانسكيي دوگوۆور» پارتياسى جەڭىسكە جەتتى. قولدانىستاعى زاڭناماعا سايكەس ارمەنيا مينيسترلەر كابينەتى پرەمەر- مينيستر تاعايىندالعاننان كەيىن ون بەس كۇن ىشىندە قۇرىلادى.
اۆتور: اياۋلىم التىنبەك