قازاقستاندىق وليمپياداشىلاردىڭ ەكىنشى لەگى توكيوعا جەتتى

نۇر- سۇلتان. قازاقپارات - قازاقستاندىق وليمپياداشىلاردىڭ تاعى ءبىر توبى الماتىدان توكيوعا ۇشىپ باردى.

دەلەگاتسيا قۇرامىندا 44 ادام بار، ونىڭ ىشىندە 23 سپورتشى، جاتتىقتىرۋشىلار، كۇردەلى عىلىمي توپتاردىڭ ماماندارى مەن اكىمشىلىك قىزمەتكەرلەرى دەپ حابارلايدى Olympic.kz.

سپورتشىلار قاتارىندا ەركىن جانە ايەلدەر كۇرەسى، ارتىستىك ءجۇزۋ، كوركەم گيمناستيكا مەن ءجۇزۋ، بەسسايىس پەن جەڭىل اتلەتيكا سپورتىنىڭ وكىلدەرى كەلگەن.

«امان- ەسەن ۇشىپ كەلدىك. وليمپيادا اۋىلىنداعى قازاقستاندىق سپورتشىلار قاتارىنا قوسىلعانشا اسىقتىق. دايىندىق پەن سپورتشىلاردىڭ قالپىنا كەلۋىنە ۋاقىت جەتەدى دەپ ويلايمىن. ءبىزدىڭ اتلەتتەر وليمپيادا ويىندارىنا قارقىندى دايىندالىپ، ەرەكشە جىگەرلەنىپ كەلدى»، - دەيدى گيۋزەل مانيۋروۆا.

جاپونياعا كەلگەن سوڭ سپورتشىلار مەن جاتتىقتىرۋشىلار كارانتين ايماعىندا بولدى. ودان كەيىن چارتەرلىك رەيسپەن توكيوعا جەتتى. جەڭىل اتلەتيكا بويىنشا باسەكەلەر 30- شىلدەدە باستالادى. ايەلدەر 100 مەتر قاشىقتىق پەن ءۇش قارعىپ سەكىرۋ بويىنشا باق سىنايدى. جارىس جولىنا ولگا رىپاكوۆا دا شىعادى. ول قازىرگى تاڭدا توكيودا جاتتىعىپ جاتىر. سونداي- اق، ولگا سافرونوۆا، ماريا وۆچيننيكوۆا، يرينا ەكتوۆا دا باق سىنايدى.

ەرلەر اراسىندا 400 مەتر قاشىقتىق بويىنشا ميحايل ليتۆين 1- تامىزدا جارىسقا قوسىلادى. 1- تامىزدان باستاپ ەلميرا سىزدىقوۆا باستاعان بۇرىمدى بالۋاندار مەن گرەك- ريم كۇرەسىنىڭ شەبەرى مەيرامبەك ايناعۇلوۆ بەلدەسەدى. 2 - تامىزدا ارتىستىك جۇزۋدەن الەكساندرا مەن ەكاتەرينا نەميچتەر، 5 - تامىزدا قازىرگى بەسسايىس بويىنشا ەلەنا پوتاپەنكو مەن پاۆەل يلياشەنكو، 6 - تامىزدا كوركەم گيمناستيكادان الينا ءادىلحانوۆا ونەر كورسەتەدى.

28 - شىلدەدەگى ناتيجە بويىنشا قازاقستان قۇراماسىنىڭ قورجىنىندا وليمپيادا ويىندارىنان ءۇش قولا مەدال بار. ونى دزيۋدوشى ەلدوس سمەتوۆ مەن اۋىر اتلەتتەر زۋلفيا چينشانلو مەن يگور سون ۇتىپ الدى.