الەم ەلدەرى ۆاكسينالاۋدى قالاي مىندەتتەپ جاتىر

نۇر-سۇلتان. قازاقپارات - الەمنىڭ ءبىرقاتار ەلىندە كوروناۆيرۋسقا قارسى ۆاكسينا الۋدى ءىشىنارا مىندەتتەۋ شارالارى ءجۇرىپ جاتىر، دەپ حابارلايدى قازاقپارات.

ماسەلەن، يتاليادا بۇقارالىق ءىس-شارالارعا تەك كوروناۆيرۋسقا قارسى ۆاكسينا العان ادامدار عانا جىبەرىلەدى. 6-تامىزدان باستاپ ۆاكسينالاۋ پروتسەسىن اياقتاعان يتاليا تۇرعىندارىنا عانا بۇقارالىق شارالار، ستاديوندار، مۋزەيلەر، تەاترلار، كينوتەاترلار، باسسەيندەر، سپورت زالدارى، بارلار مەن مەيرامحانالار قولجەتىمدى بولادى.

بارلار مەن مەيرامحانالاردىڭ اشىق تەرراسسالارىنا كىرۋ ءۇشىن ۆاكسينالاۋ پاسپورتى قاجەت ەمەس. 20-تامىزدان باستاپ بىرىككەن اراب امىرلىكتەرىندە ۆاكسينا الماعان ازاماتتارعا مەملەكەتتىك جانە جەكە مەكتەپتەرگە، ۋنيۆەرسيتەتتەرگە، بالاباقشالارعا، ساۋدا ورتالىقتارىنا، مەيرامحانالارعا، كافەلەرگە، سپورت زالدارىنا، مۋزەيلەرگە، كۋرورتتارعا جانە باسقا دا ساۋدا نۇكتەلەرىنە كىرۋگە تىيىم سالىنادى. ال برازيليادا جوعارعى فەدەرالدى سوت رەسمي تۇردە بيلىككە كوروناۆيرۋسقا قارسى ەرىكتى ۆاكسينالاۋ كۇتىلەتىن ناتيجە بەرمەسە، ۆاكسينالاۋدى مىندەتتەۋگە رۇقسات بەردى.

دەگەنمەن، بۇل شارانى ىسكە اسىرۋ ءۇشىن جەكە زاڭ قابىلداۋ قاجەت. سۋديالاردىڭ پىكىرىنشە، ۆاكسينالاۋدان سانالى تۇردە باس تارتقان ادامدار كەسىرىنەن ۇجىمدىق دەنساۋلىق بۇزىلماۋى كەرەك. ا ق ش- تا جۇمىسپەن قامتۋدىڭ تەڭ مۇمكىندىكتەرى جونىندەگى كوميسسيا ازاماتتاردىڭ ءوتىنىشى بويىنشا جۇمىس بەرۋشىلەر ءوز قىزمەتكەرلەرىن COVID-19 ۆاكسيناسىن الۋعا ءماجبۇر ەتە الادى دەپ شەشتى. ودان تەك مۇگەدەكتىككە نەمەسە ءدىني سەنىمدەرگە بايلانىستى باس تارتۋعا بولادى. ا ق ش- تىڭ Morgan Stanley بانكى نيۋ-يوركتەگى قىزمەتكەرلەرىنە COVID-19 ۆاكسيناسىن تولىق الماسا، كەڭسەلەرگە ورالا المايتىندارىن ەسكەرتتى. مۇلدەم ۆاكسينا الماعان نەمەسە تولىق ۆاكسينالانباعان بانك قىزمەتكەرلەرى قاشىقتان جۇمىس ىستەۋگە ءماجبۇر بولادى، دەلىنگەن قىزمەتكەرلەرگە جىبەرىلگەن ىشكى حاتتا.

اقپان ايىندا يندونەزيادا ۆاكسينانى قالاماعاندار ءۇشىن ايىپپۇلدار مەن الەۋمەتتىك كومەكتەن باس تارتۋ جۇيەسى ەنگىزىلدى. بۇل ايىپپۇل باي ەلدەردىڭ ولشەمىمەن دە وتە اۋقىمدى، دجاكارتادا 5 ميلليون رۋپي (350 دوللار) سالىنادى.

قىتايدا مەملەكەتتىك دەڭگەيدە ۆاكسينالاۋ ەرىكتى بولىپ قالا بەرەدى، ءبىراق جەرگىلىكتى بيلىك قىسىم كورسەتۋدە: حاينان پروۆينسياسىنداعى اكىمشىلىك ۆاكسيناعا قارسى ديسسيدەنتتەردى قارا تىزىمگە ەنگىزۋگە جانە ولاردى مەملەكەتتىك جاردەماقىلار مەن قوعامدىق كولىكتى پايدالانۋ قۇقىعىنان ايىرۋعا ۋادە بەردى.

بەلگيادا 13-تامىزدان باستاپ 1500 دەن استام ادام قاتىساتىن اشىق ءىس-شارالار ۆاكسينالاۋ سەرتيفيكاتى جوق ادامدار ءۇشىن شەكتەۋلى بولادى.

اۋستراليادا 28-ماۋسىمدا ءبىرقاتار ماماندىق ءۇشىن مىندەتتى ۆاكسينالاۋ ەنگىزىلدى. ۆاكسيناسىز قارت ادامدارعا كۇتىم جاساۋعا بايلانىستى مەكەمەلەردە جۇمىس ىستەۋگە بولمايدى. قارتتار ۇيلەرىنىڭ، مۇگەدەكتەر مەن قارتتارعا ارنالعان ينتەرناتتاردىڭ بارلىق قىزمەتكەرلەرى ۆاكسينانىڭ العاشقى دوزاسىن 2021 -جىلدىڭ قىركۇيەك ايىنىڭ ورتاسىنان كەشىكتىرمەي الۋى كەرەك.

تىزبەگە مەملەكەتتىك كارانتين جۇيەسىنىڭ، اۋەجايلار مەن اۆياتسيالىق ينفراقۇرىلىم قىزمەتكەرلەرىن، سونداي- اق ءوڭىرارالىق جۇك تاسىمالى مەن تاۋ-كەن ءوندىرۋ سالاسىندا جۇمىس ىستەيتىن قىزمەتكەرلەردى ەنگىزۋ جوسپارلانۋدا.

اۆتور: ايجان سەرىكجان قىزى