ەلوردادا رەانيماتسياعا ۆاكسينا الماعاندار ءتۇسىپ جاتىر - دەنساۋلىق ساقتاۋ باسقارماسى
بۇل تۋرالى قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ايتتى، دەپ حابارلايدى قازاقپارات قالا اكىمدىگىنە سىلتەمە جاساپ.
«بىزدەگى رەانيماتسيالىق توسەكتەر % 84- عا تولدى. كوروناۆيرۋس ينفەكسياسىنا قارسى ەكپە الماعان، اۋىر كۇيدە جاتقان 248 پاتسيەنت بار. ونىڭ ىشىندە 77 ادام وتە اۋىر حالدە جاتىر. ناۋقاستاردىڭ باسى- قاسىندا جۇرگەندىكتەن بۇل كورسەتكىش قاتتى الاڭداتىپ وتىر. ءبىز وتكەن جىلعى ەڭ اۋىر كۇيگە جەتەيىن دەپ قالدىق»، - دەيدى باسقارما باسشىسى.
تيمۋر مۇراتوۆتىڭ ايتۋىنشا اۋىر كۇيدە جاتقاندار اراسىندا قارت كىسىلەر عانا ەمەس 35 جاستاعى ناۋقاستار دا بار.
«ۆيرۋس جاڭا شتامدارعا مۋتاتسيالانىپ وتىرادى، ولار جاستار اراسىندا ءجيى تىركەلۋدە. قازىر جاستار دا، ءتىپتى بالالار دا ينفەكسيانىڭ اۋىر كۇيىنە ۇشىراي باستادى. ەكى- ءۇش كۇن ىشىندە پاتسيەنتتەردىڭ دەنساۋلىعى ناشارلاعانى سونشالىق جاساندى تىنىس الۋ اپپاراتىنسىز ءومىر سۇرە المايتىن كۇيگە جەتەدى. رەانيماتسياداعى بارلىق پاتسيەنتتىڭ مۇنداي جاعدايعا ءتۇسۋىنىڭ سەبەبى - ۆاكسيناتسيالانباۋدان. ءبىراق ولار مۇنى كەش ءتۇسىندى»، - دەپ اتاپ ءوتتى ت. مۇراتوۆ.
تيمۋر مۇراتوۆ قالا تۇرعىندارىن ۋاقىتىندا ۆاكسيناتسيادان وتۋگە، وسى ارقىلى وزدەرىن ينفەكسيا جۇقتىرۋدان قورعاۋعا شاقىردى.
«قۇرمەتتى ازاماتتار! ويلانىپ جانە كۇتىپ وتىراتىن ۋاقىت جوق! قازىر ۆاكسيناتسيا الۋ وتە ماڭىزدى، ايتپەسە كەش بولۋى مۇمكىن. بىزگە، ياعني دارىگەرلەرگە، ك ۆ ي- گە بايلانىستى قايتىس بولعاندار ستاتيستيكاسىن جاريالاۋ، تۋىستارىنا جاقىنى كەلمەسكە كەتكەنىن ايتۋ وڭاي ەمەس. وتكەن جىلى ءبىز پاندەميانى جەڭۋدىڭ بارلىق جولىن ىزدەگەن ەدىك، ال قازىر قولىمىزدا بار، ول - ۆاكسيناتسيا. وسى ارقىلى عانا ءبىز اۋرۋدىڭ قيىن كەزەڭىنەن شىعا الامىز»، - دەپ قورىتىندىلادى قالالىق دەنساۋلىق ساقتاۋ باسقارماسىنىڭ باسشىسى.