ماجارستاندا كوشپەندىلەر ويىنىنان سايىس ءوتتى - فوتو
وعان قاتىسقاندار ات جارىس، جەكپە-جەك، قاشىقتان ساداق اتۋ، سەمسەرلەسۋ سىندى كوشپەندىلەر ويىندارىنىڭ 10 تۇرىنەن ونەر كورسەتتى، دەپ حابارلايدى قازاقپارات.
جارىسقا كەلگەندەر ماجارلاردىڭ ۇلتتىق سۇڭقار ۇشىرۋ ءداستۇرىن تاماشالاپ، كوشپەندى تۇرمىسقا قاتىستى فوتوكورمە، كيىز ءۇي جابدىقتارى مەن قارۋ- جاراق تۇرىمەن تانىستى. ءىس- شارا «ماجار- تۇران» قورى قۇرعان ۇلتتىق سپورت تۇرلەرى قاۋىمداستىعى مەن ماجارستانداعى «ساداقشىلار جولى» مەكتەبىنىڭ ۇيىمداستىرۋمەن ءوتتى. شارانىڭ نەگىزگى ماقساتى - كوشپەندىلەر مۇراسىن ساقتاۋ ءارى ونى قايتا جاڭعىرتۋ.
كوشپەندىلەر رۋحى مەن سپورتىن دارىپتەيتىن شارانىڭ اشىلۋ سالتاناتىندا البەرتيرشا قالاسىنىڭ ءمەرى فازەكاش لاسلو مەن «ماجار- تۇران» قورىنىڭ پرەزيدەنتى اندراش بيرو ءسوز سويلەپ، قاتىسۋشىلار مەن كورەرمەندەردى قۇتتىقتادى. سونىمەن قاتار سايىستىڭ سالتاناتتى اشىلۋىنا قازاقستاننىڭ ماجارستانداعى ەلشىلىگى وكىلدەرى قاتىستى.
ەكى كۇنگە سوزىلعان شارادا قوناقتار نازارىنا كوشپەندىلەر ۇلگىسىمەن ساندەلگەن كيىز ۇيلەر، اتا- بابالارىمىزدىڭ ءومىر سالتى مەن قارۋ-جاراق ونەرى جايلى كورمە ۇسىنىلدى. سونداي- اق، شارا قوناقتارى كوشپەندىلەردىڭ كيىم كيۋ ەرەكشەلىگى، ات ابزەل تۇرلەرى مەن وزگە دە قۇرال- جابدىقتارمەن تانىسىستىرىلدى. جۇيرىك اتتار مەن وركەشتى تۇيلەرە قوناقتاردى ءتانتى ەتتى. باعدارلاما اياسىندا كورەرمەندەرگە قۇس سالۋ، سوعىس ونەرى مەن قارۋ- جاراق تۇرلەرى، كوكپار تارتۋ، ات سپورتى تورەلىگى بويىنشا قويىلىمدار ۇسىنىلدى. سونداي-اق، ءداستۇرلى قولونەر بۇيىمدارى قويىلعان جارمەڭكە ۇيىمداستىرىلدى. ءىس-شارا سوڭىندا جەڭىمپازدارعا ارنايى كۋبوك، مەدالدار مەن باعالى سىيلىقتاردى «ماجار- تۇران» قورىنىڭ پرەزيدەنتى اندراش بيرو تابىس ەتتى. ايتا كەتەيىك، 13-15 تامىز كۇندەرى ماجارستان استاناسى بۋداپەشت ماڭىنداعى بۋگاتس قالاشىعىندا، «ماجار- تۇران» حالىقارالىق قورىنىڭ ۇيىمداستىرۋىمەن، ءداستۇرلى «بابالار كۇنى» شاراسى وتەدى. شارانىڭ ماقساتى - ەرتە تۇركى- عۇن مادەنيەتىن جاڭعىرتۋ، سالاعا عىلىمي ورتانى تارتۋ.
ايتا كەتەرلىگى، قازاقستان مەن ماجارستان اراسىنداعى قاتىناس ەگەمەندىك العان تۇسىمىزدا باستالدى. بۇل - قازاق ەلىنىڭ تاۋەلسىزدىگىن مويىنداعان العاشقى مەملەكەتتەردىڭ ءبىرى. قازاقستاننىڭ ەۋروپالىق وداقپەن ىنتىماقتاستىعىنىڭ جاڭا دەڭگەيگە شىعۋى ەكى ەل اراسىنداعى ديپلوماتيالىق قاتىناستاردى نىعايتا ءتۇستى. ەل استاناسى بۋداپەشتتە مادەني- گۋمانيتارلىق باعىتتاعى شارالار ءجيى ۇيىمداستىرىلادى.
بۋداپەشتتە استانا كوشەسى، اباي ەسكەرتكىشى بار، اباي وقۋلارى ءجيى وتەدى، ماجارستانداعى قر ەلشىلىگى جانىندا «اباي ورتالىعى» جۇمىس ىستەپ تۇر. ەكى ەل اراسىنداعى مادەني، عىلىمي بايلانىستار ارقاسىندا جىل سايىن 250 جاس قازاقستاندىق ءبىلىمىن ماجارستاندا جەتىلدىرۋ مۇمكىندىگىنە يە.