وسى ورايدا ۆاكسينادان باس تارتقان قىزمەتكەرلەر قالاي جۇمىس ىستەيدى دەگەن سۇراققا ق ر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا جاۋاپ بەردى، دەپ حابارلايدى قازاقپارات ءتىلشىسى.
«بۇگىندە الەم بويىنشا 189 ميلليون جاعداي تىركەلدى. ايتا كەتۋ كەرەك، سوڭعى اپتا ىشىندە الەم بويىنشا كوروناۆيرۋس ىندەتىنە شالدىققاندار سانى 2 ەسەگە ارتىپ وتىر. دەرتتىڭ ۇدەيە ءتۇسۋى دەلتا-شتاممەن دە بايلانىستى، بۇگىندە اتالعان ينفەكسيا ءتۇرى 100 دەن استام ەلدە تىركەلدى. قازاقستان 26- ماۋسىمنان باستاپ «قىزىل ايماقتا» تۇر. ەلىمىزدە 13 ءوڭىر ىندەت قاۋپى ءتونىپ تۇرعان ايماقتار قاتارىندا. قازاقستاندا كوۆيد ىندەتىنىڭ تارالۋى وكىنىشكە قاراي ءوسىپ وتىر»، - دەدى ايجان ەسماعامبەتوۆا و ك ق- دە وتكەن باسپا ءسوز ءماسليحاتىندا.
كوميتەت باسشىسى بۇگىندە ەلىمىزدىڭ بارلىق اۋماعىندا كارانتيندىك شەكتەۋلەردىڭ قاتاڭداتىلىپ جاتقانىن العا تارتتى.
«ەڭبەك كودەكسىنە سايكەس جۇمىس بەرۋشى ۆاكتسينا الماعان قىزمەتكەردى جۇمىستان بوساتۋعا قۇقىعى بار. ماقسات - جۇمىستان قۋۋ ەمەس، كەرىسىنشە ۇجىمداعى باسقا دا ازاماتتاردىڭ دەنساۋلىعىن ساقتاپ، قاۋىپسىزدىكتى قامتاماسىز ەتۋ. قىزمەتكەر جۇمىستان ۋاقىتشا بوساتىلادى، ياعني ۆاكسينا العان جاعدايدا ول ءوز جۇمىسىن قايتا جالعاستىرا الادى. سونداي-اق، ۆاكسينا الماعان جاعدايدا قىزمەتكەر اپتاسىنا ءبىر پ ت ر تەست تاپسىرۋىنا دا بولادى»، - دەيدى ول.