ماماندار مەرەكەنى ۇيدە اتاپ ءوتۋ كەرەكتىگىن ايتىپ وتىر. مەشىت اۋماعىنا ادام كىرگىزبەيمىز دەدى. ال قۇرباندىقتى ونلاين شالۋعا بولادى. ءدىني باسقارما قىزمەتكەرلەرى مال باعاسىنىڭ ءوسىپ كەتپەۋىن قاتاڭ قاداعالاماق. قازىردىڭ وزىندە شەكتى باعاسىن بەلگىلەپ قويعان. قۇربان ايتقا دەيىن ءالى ءبىر اپتا بار. سودان شىعار، مال بازاردا ادام قاراسى ازداۋ. ساۋدا قىز- قىز قايناپ جاتىر دەۋگە كەلمەيدى. ءبىراق اراسىندا مەرەكەگە قازىردەن قامدانىپ، قۇرباندىققا شالاتىن مالدى تاڭداپ كەتكەندەرى دە بار ەكەن. باعا دا ءبىرشاما ءوسىپتى. ساتۋشىلار بيىل جەم- ءشوپ قىمباتتادى دەيدى.
ايبەك ەسبايقاجى ۇلى، مال ساتۋشى:
- بيىلعى مارقا قوزىلار 35 مىڭ تەڭگەدەن باستالادى. ىرىلەرى، جاقسىلارى 50 مىڭعا دەيىن بارادى ەندى. ودان كەيىن ساۋلىق قويلار، تۇساقتارىمىز بار. ولار سول 55 مىڭ تەڭگە، كۇيىنە قارايمىز، 60-70 مىڭ تەڭگەگە دەيىن باراتىندارى دا بار.
قۇربان ايت كەزىندە باعانىڭ تىم شارىقتاپ كەتپەۋىن ءدىني باسقارما قىزمەتكەرلەرى ءجىتى قاداعالايتىن بولادى. ولار ۇساق مالدى ءارى كەتسە - 70 مىڭ تەڭگەگە، ءىرى- قارانى 420 مىڭ تەڭگەگە ساتۋعا رۇقسات بەردىك دەيدى. ماماندار ءبىراز وڭىردە ىندەت قايتا ءورشىپ جاتقاندىقتان، بيىل دا مەشىتتەرگە جاماعات جيمايمىز دەپ وتىر. قۇرباندىقتى ونلاين شالۋعا بولادى.
اعابەك قونارباي ۇلى، ق م د ب باسپا ءسوز حاتشىسى:
- ادامدار كوپ شوعىرلاناتىن ورىندارعا بارماي، ۇيدە وتىرىپ- اق ءبىزدىڭ «قۇربان 2021» دەگەن ۆەب- سايت ارقىلى تاپسىرىس بەرىپ، قوي بولا ما، ءىرى- قارا مال بولا ما، ءوزىنىڭ تاڭداعان مالىن تاڭداپ، تاپسىرىس بەرىپ، ءوزى ۇيدەن شىقپاي مۇقتاج جاندارعا ەت تاراتۋلارىنا مۇمكىندىك بار. ونىڭ بارلىعىن ءبىزدىڭ مەشىت قىزمەتكەرلەرى، ەرىكتى ازاماتتار بار، بارلىعىن تەگىن جۇزەگە اسىرادى.
ودان بولەك، مەرەكە كەزىندە ايتشىلاۋعا تىيىم سالىنعان. بۇل كۇندى ۇيدە، وتباسىڭمەن وتكىزگەن دۇرىس دەپ وتىر. قاۋىپتى ايماققا ەنگەن وڭىرلەردە مال بازارلارى جۇمىس ىستەمەيدى.
ەرجان بايتانايەۆ، ق ر د س م سانيتارلىق- ەپيدەميولوگيالىق باقىلاۋ كوميتەتىنىڭ رەسمي وكىلى:
- قۇربان ايت بىزدە مەيرام بولعاندىقتان، كۇنتىزبەدە قىزىل كۇن، ياعني ازاماتتارىمىزعا دەمالىس بولىپ سانالادى. سول سەبەپتى ول كۇنى جۇمىس جۇرگىزىلمەيدى. ەشقانداي ازامات مال شالاتىن جەرگە بارمايدى. بارلىعى ونلاين تۇردە جۇرگىزىلەدى. بيىل قۇربان ايت 20 - شىلدە كۇنى وتەدى. ءيسى مۇسىلمان جاعدايى جەتىپ جاتسا، جارلى- جاقىبايلاردى جارىلقاۋ كەرەك.
www.24.kz