«قازمۇنايگاز» ۇ ك ا ق باسقارماسىنىڭ شەشىمىمەن «اتىراۋ مۇناي وڭدەۋ زاۋىتى» ج ش س باس ديرەكتورى بولىپ ارمان قايىردەنوۆ تاعايىندالدى. كاسىپورىننىڭ بۇرىنعى باسشىسى شۋحرات دانباي قىزمەتىنەن بوساتىلدى.
ارمان قۇرمەت ۇلى قايىردەنوۆ 1971 -جىلى اتىراۋدا دۇنيەگە كەلگەن. قازاق حيميا- تەحنولوگيا ينستيتۋتىن بىتىرگەن. ماماندىعى - ينجەنەر- حيميك- تەحنولوگ. 2003 -جىلى رەسەي فەدەراتسياسى ۇكىمەتى جانىنداعى حالىق شارۋاشىلىعى اكادەمياسىن مۇناي بيزنەسى ماماندىعى بويىنشا ءتامامدادى. ەڭبەك جولىن 1993 -جىلى اتىراۋ مۇناي وڭدەۋ زاۋىتىندا تەحنولوگيالىق قۇرىلعى وپەراتورى بولىپ باستادى. زاۋىتتا ءتۇرلى لاۋازىمداردا 13 جىل جۇمىس ىستەدى.
سونداي- اق، ءار جىلدارى «قازمۇنايگاز» ۇ ك ا ق مۇناي وڭدەۋ دەپارتامەنتى ديرەكتورىنىڭ ورىنباسارى، باس ديرەكتوردىڭ ورىنباسارى، Rompetrol Rafinare S.A. باس ديرەكتورى قىزمەتتەرىن اتقاردى. 2012-2013 -جىلدارى «ا م ءو ز» ج ش س باس ديرەكتورى بولدى. 2020 -جىلدىڭ شىلدەسىنەن وسى ۋاقىتقا دەيىن «قازمۇنايگاز» ۇ ك ا ق مۇناي جانە مۇناي-حيميا وڭدەۋ دەپارتامەنتىنىڭ ديرەكتورى بولىپ جۇمىس ىستەدى.
ايتا كەتەيىك، تاياۋدا پرەزيدەنت قاسىم- جومارت توقايەۆ سۇيىتىلعان گاز جەتكىزۋشى كاسىپورىن - اتىراۋ مۇناي وڭدەۋ زاۋىتىنىڭ جۇمىسىن سىنعا العان بولاتىن.
«جاڭعىرتۋ جۇمىستارى 2018 -جىلى اياقتالعانىنا قاراماستان، كاسىپورىن جۇمىسىندا ءالى دە ىركىلىستەر بار. ناتيجەسىندە، مۇناي ونىمدەرىنىڭ بارلىق ءتۇرى بويىنشا ءوندىرىس كولەمى كەمىپ، سونىڭ ىشىندە، سۇيىتىلعان گاز ازايىپ كەتتى. بۇل جانارماي قۇيۋ ستانسيالارىنداعى تاپشىلىققا جانە باعانىڭ شارىقتاۋىنا الىپ كەلدى. وسىعان بايلانىستى ۇكىمەتكە سۇيىتىلعان گازعا دەگەن سۇرانىستىڭ ارتۋ پەرسپەكتيۆاسىن زەرتتەپ، ونى ءوندىرۋدىڭ قوسىمشا قۋات كوزدەرىن ىزدەستىرۋ جونىندە ۇسىنىس ەنگىزۋدى تاپسىرامىن. گاز تاراتۋ جۇيەسىنە قاتىستى ماسەلەنى جەكە قاراستىرۋ قاجەت. قازىرگى ۋاقىتتا اتالعان پروتسەسس جابىق ءارى تۇسىنىكسىز جاعدايدا ىسكە اسىرىلادى. بۇل سىبايلاس جەمقورلىقتىڭ ەتەك جايۋىنا الىپ كەلەدى. ءتيىمسىز دەلدالدارعا جول بەرمەۋ جانە نارىق باعاسىن قالىپتاستىرۋ ماقساتىندا ەلەكتروندى ساۋدا الاڭدارى ەنگىزىلدى. ولاردىڭ الەۋەتىن بارىنشا پايدالانۋ كەرەك. مەملەكەتتىك ورگاندار مەن بيزنەس جاڭا تارتىپتە جۇمىس ىستەۋگە بەيىمدەلۋى ءتيىس»، - دەدى قاسىم- جومارت توقايەۆ.