بۇل سۇراققا ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ جاۋاپ بەردى، دەپ حابارلايدى قازاقپارات ءتىلشىسى.
«كادرمەن قامتاماسىز ەتۋ ماسەلەسىنە بولەك توقتالعىم كەلەدى. وكىنىشكە قاراي، سوڭعى جىلدارى سۋ ماماندارى بۇل سالادان كوپتەپ كەتىپ جاتىر. 2020-جىلى ءبىزدىڭ باستامامىزبەن اتالعان سالانى كادرمەن قامتۋ ماقساتىندا م. ح. دۋلاتي اتىنداعى تاراز مەملەكەتتىك ۋنيۆەرسيتەتى جانىنان سۋ شارۋاشىلىعى ينستيتۋتى اشىلدى. سونداي-اق، بيىل سۋ شارۋاشىلىعى ماماندارىنىڭ بىلىكتىلىگىن ارتتىرۋ ماقساتىندا 2 ورتالىق اشىلدى. ءبىرىنشىسى، س ق و- دا، ەكىنشىسى الماتى قالاسىندا»، - دەدى م. مىرزاعاليەۆ.
ءمينيستردىڭ ايتۋىنشا، بيىل اتالعان ورتالىقتار ارقىلى 800 ماماننىڭ ءبىلىمىن جەتىلدىرۋ كوزدەلىپ وتىر. ودان بولەك، 15 جاس ماماننان تۇراتىن كادرلىق رەزەرۆ قۇرىلعان. بۇعان دەيىن م. مىرزاعاليەۆ ەلىمىزدە اپاتتى جاعدايداعى سۋ قويمالارىنىڭ جوندەۋدەن ءوتىپ جاتقانى تۋرالى ايتتى.