نۇر-سۇلتان قالاسىنىڭ توتەنشە جاعدايلار دەپارتامەنتى باستىعىنىڭ ورىنباسارى قۋانار بازاربايەۆ ءماسليحات دەپۋتاتتارىنا وسىنداي مالىمەت بەردى، دەپ حابارلايدى قازاقپارات.
نۇر-سۇلتان قالالىق ءماسليحاتىنىڭ توتەنشە جاعدايلاردىڭ الدىن الۋ جانە ءورت قاۋىپسىزدىگى ماسەلەلەرى جونىندەگى تۇراقتى كوميسسياسىنىڭ وتىرىسىندا توتەنشە جاعدايلار دەپارتامەنتى باستىعىنىڭ ورىنباسارى قۋانار بازاربايەۆ ۇركەر كەنتىندە ءورت ءسوندىرۋ دەپوسى سالىناتىنىن ايتتى.
«بۇگىنگى تاڭدا ءبىز 3 ءورت ءسوندىرۋ دەپوسى بويىنشا جۇمىس جۇرگىزىپ جاتىرمىز. 28-كوشەدە ورنالاسقان دەپو بويىنشا جوبالاۋ جۇمىستارى ءجۇرىپ جاتىر. تاعى ءبىر دەپو بويىنشا قۇرىلىسىن باستاۋعا قارجى ءبولىندى. ۇركەر كەنتىندەگى دەپوعا كەلسەك، بيىل مۇندا دا ءورت ءسوندىرۋ دەپوسىنىڭ قۇرىلىسى باستالادى. قازىر كونكۋرس جۇرۋدە. اقشاسى دايىن تۇر. بايقاۋ راسىمدەرىن شىلدە ايىنىڭ سوڭىندا اياقتاۋ جوسپارلانعان»، - دەپ جاۋاپ بەردى قۋانار بازاربايەۆ دەپۋتاتتاردىڭ ساۋالىنا.