قۇجاتتىڭ تولىق اتاۋى - «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭى جوباسى.
مينيسترلىكتىڭ باسپا ءسوز قىزمەتى اتالمىش وزگەرىس حالىقارالىق تاجىريبەگە سۇيەنە وتىرىپ دايىندالعانىن حابارلادى.
«قورعانىس مينيسترلىگى قازىرگى زامانعى سىن-قاتەرلەرگە تۇراقتى نەگىزدە تالداۋ جۇرگىزەدى. ولارعا قارۋلى جانجالدار، سونىمەن قاتار اۆاريامەن، پاندەميامەن، ەكولوگيالىق اپاتپەن بايلانىستى توتەنشە جاعدايلار جاتادى. مۇنداي جاعدايلاردا قارۋلى كۇشتەر مەن جۇمىلدىرۋ رەزەرۆى قولدانىستاعى زاڭناماعا سايكەس تارتىلۋى مۇمكىن. بۇل رەتتە حالىقارالىق تاجىريبە جۇمىلدىرۋ رەزەرۆىن ورىستەتۋ مەن تارتۋدىڭ قىسقا مەرزىمدە تالاپ ەتىلۋى مۇمكىن ەكەنىن كورسەتەدى»، - دەپ ءتۇسىندىردى مينيسترلىك وكىلدەرى.
وسىنى ەسكەرگەن قورعانىس مينيسترلىگى رەزەرۆتەگى اسكەري قىزمەتتى ەنگىزۋ جوسپارلاپ وتىر. رەزەرۆتەگى قىزمەت ازاماتتاردىڭ نەگىزگى جۇمىسىن قوسا اتقارۋىمەن، جالاقىسىن ساقتاي وتىرىپ، اسكەردەگى قىزمەتى ءۇشىن قوسىمشا تولەم بەرىلە وتىرىپ، كەلىسىمشارت نەگىزىندە اتقارىلادى.
«ءتيىستى قاجەتتى ماماندىقتارى بار ازاماتتار اسكەري بولىممەن رەزەرۆتە قىزمەت وتكەرۋ تۋرالى 3 جىلعا ءتيىستى كەلىسىمشارت جاسايدى. رەزەرۆتەگى ادامداردى دايارلاۋ جىلىنا 60 كۇننەن اسپايتىن مەرزىمدە جۇرگىزىلەتىن بولادى. ول وقىتۋ باعدارلاماسىنا سايكەس ۇزاقتىعى 1 ايعا دەيىن اي سايىنعى ەكى كۇندىك ساباقتار مەن جيىنداردان (وقۋ-جاتتىعۋلاردان) تۇرادى. بۇل رەتتە تاپشى ماماندىقتار بويىنشا دايارلىققا ەرەكشە نازار اۋدارىلاتىن بولادى»، - دەلىنگەن مينيسترلىكتىڭ رەسمي مالىمەتىندە.
رەزيەۆتەگى اسكەري قىزمەت وتكەرۋشىلەرگە اسكەري بولىمدەردە ساقتاۋدا تۇرعان قارۋ مەن جاۋىنگەرلىك تەحنيكا بەكىتىلىپ بەرىلەدى. اسكەري بولىمدەر ولاردى ساباقتار مەن وقۋ-جاتتىعۋلار كەزىندە ءتيىستى كيىم-كەشەكپەن، كازارمادان تۇراتىن ورىنمەن جانە تاماقپەن قامتاماسىز ەتۋگە ءتيىس.
ال رەزەرۆتەگى اسكەري قىزمەتى ءۇشىن اي سايىن ەڭ تومەنگى 1 جالاقى مولشەرىندە، جيىندار (وقۋ- جاتتىعۋلار) وتكىزۋ كەزەڭىندە رەزەرۆتەگى ادامنىڭ ورتاشا جالاقىسى مولشەرىندە ايلىق تولەنەدى.
«ساباقتار مەن وقۋ-جاتتىعۋلاردا بولۋ مەرزىمى اسكەري قىزمەتتەگى ەڭبەك سىڭىرگەن جىلدارىنىڭ جالپى مەرزىمىنە كىرەدى. رەزەرۆتەگى قىزمەت قىسقا مەرزىمدە ءتيىستى اسكەري بولىمگە كەلۋگە جانە قويىلعان مىندەتتەردى ورىنداۋعا دەرەۋ كىرىسۋگە ءازىر، دايارلانعان ازاماتتاردىڭ بولۋىنا مۇمكىندىك بەرەدى»، - دەيدى مينيسترلىك ماماندارى.