ۆاكسينادان كەيىن كوروناۆيرۋسقا قارسى يممۋنيتەت ەكى جىلعا دەيىن سوزىلۋى مۇمكىن – مامان

قاراعاندى. قازاقپارات - پاندەميامەن كۇرەسۋ ءۇشىن ۇجىمدىق يممۋنيتەتتى قالىپتاستىرۋ قاجەت. بۇعان تەك ۆاكسيناتسيا ارقىلى قول جەتكىزۋگە بولادى.

بۇل تۋرالى قاراعاندى مەديتسينا ۋنيۆەرسيتەتىنىڭ قاۋىمداستىرىلعان پروفەسسورى، ينفەكتسيونيست- دارىگەر اننا كناۋس ايتتى، دەپ حابارلايدى قازاقپارات ءتىلشىسى.

سپيكەردىڭ ايتۋىنشا، كوروناۆيرۋسپەن اۋىراتىن ناۋقاستاردا اۋرۋمەن كۇرەسۋگە ىقپال ەتەتىن جادى جاسۋشالارى بار بولعانى 3-6 ايعا بەلسەندى بولادى. سودان كەيىن ولار دەنەنى قورعاۋدى توقتاتادى، سوندىقتان كوروناۆيرۋس قايتالانادى نەمەسە كوۆيدتىڭ ۇزاق اعىمىنىڭ قۇبىلىستارى پايدا بولادى.

«ءبىزدىڭ اعزامىز كوروناۆيرۋسپەن وزدىگىنەن كۇرەسىپ، ءبىزدى اۋرۋدان قورعايتىن جەتكىلىكتى مولشەردە جاسۋشالار جاساي المايتىنى بەلگىلى بولدى. ءبىز ءالى ۇجىمدىق يممۋنيتەتكە قول جەتكىزە المادىق. مۇنداي جاعدايلاردا ۆاكسيناتسيانىڭ قاجەتتىلىگى ايقىنداي تۇسەدى. ياعني، ءبىز ۆاكسينالاردى ەنگىزۋ ارقىلى جاساندى يممۋنيتەتتى قۇرۋ كەزەڭىنە كوشتىك»، - دەيدى اننا كناۋس وڭىرلىك كوممۋنيكاتسيالار قىزمەتىنىڭ الاڭىندا وتكەن بريفينگ بارىسىندا.

ۆاكسينا جاساۋ تەحنولوگياسى بۇكىل الەمدە بىردەي. نولدەن باستاپ بىردە- ءبىر ەل ۆاكسينا جاساعان ەمەس.

«ۆاكسينالاردىڭ ماقساتى بىردەي. ولاردىڭ بارلىعى كوروناۆيرۋسپەن كۇرەسۋگە باعىتتالعان. گامالەيا ينستيتۋتىنىڭ مالىمەتى بويىنشا، سپۋتنيك V ۆاكسيناسىنىڭ ءبىرىنشى كومپونەنتىن العاننان كەيىن ءبىزدىڭ اعزامىزدا 3-6 ايعا دەيىن ارەكەت ەتەتىن قورعانىس جاسۋشالارىنىڭ العاشقى قورى جاساقتالادى. تولىق ۆاكسيناتسيادان كەيىن قورعانىس توسقاۋىلى ەكى جىلعا دەيىن سوزىلۋى مۇمكىن»، - دەدى اننا كناۋس.

اۆتور: اگاتا مۋحامەدجانوۆا