قازاقستان جاستارىنا «تاۋەلسىزدىك ۇرپاقتارى» گرانتى بەرىلمەك

نۇر-سۇلتان. قازاقپارات - ق ر ۇكىمەتىنىڭ قاۋلىسىمەن «تاۋەلسىزدىك ۇرپاقتارى» گرانتى تاعايىندالدى، دەپ حابارلايدى قازاقپارات.

«گرانت بەرۋدىڭ ماقساتى بەلسەندى شىعارماشىل جاستار قاۋىمداستىعىن قالىپتاستىرۋعا باعىتتالعان، جاستاردىڭ جاڭا جانە قولدانىستاعى باستامالارىن مەملەكەتتىك قولداۋ»، - دەلىنگەن ۇكىمەت قاۋلىسىندا.

گرانت بەرۋ مىندەتتەرى:

تالانتتى جانە تالاپتى جاستاردى قولداۋ؛

ەلدىڭ الەۋمەتتىك-ەكونوميكالىق دامۋى ءۇشىن پراكتيكالىق قىزىعۋشىلىق تانىتاتىن جاستاردىڭ يننوۆاتسيالىق جوبالارى مەن عىلىمي-تەحنيكالىق ازىرلەمەلەرىن انىقتاۋ جانە قولداۋ؛

جاستاردىڭ جاڭا جانە قولدانىستاعى ستارتاپ-جوبالارىن ىسكە اسىرۋعا جاردەم كورسەتۋ؛

جاستار اراسىندا شىعارماشىلىق قىزمەتتى تانىمال ەتۋ.

گرانتتىڭ مولشەرى مەن سانىن ۇكىمەت جىل سايىن بەلگىلەيدى.

گرانتتار ق ر ازاماتتارىنا جاڭا يدەيالار مەن باستامالاردى ىسكە اسىرۋ ءۇشىن كەلەسى باعىتتار بويىنشا كونكۋرستىق نەگىزدە بەرىلەدى:

«عىلىم» - عىلىمنىڭ باسىم سەكتورلارىندا جاڭا عىلىمي جوبالار مەن زەرتتەۋلەردى ىسكە اسىرۋ ءۇشىن؛

«مادەنيەت» - قازاقستاننىڭ مادەني مۇراسىن تانىمال ەتۋگە، حالىقتىق مادەني داستۇرلەر مەن ونەردى ىلگەرىلەتۋگە باعىتتالعان جوبالاردى ىسكە اسىرۋ ءۇشىن؛

«اقپاراتتىق تەحنولوگيالار» - جاڭا IT- شەشىمدەر مەن جوبالاردى، ونىڭ ىشىندە باستاۋشى ستارتاپ-جوبالاردى ىسكە اسىرۋ جانە ازىرلەۋ ءۇشىن؛

«بيزنەس» - ەكونوميكانىڭ باسىم سەكتورلارىندا جاڭا بيزنەس- يدەيالاردى ىسكە اسىرۋ ءۇشىن؛

«مەديا» - جاڭا مەديا-جوبالاردى، ونىڭ ىشىندە جاستار ءۇشىن تانىمدىق، پايدالى، قىزىقتى كونتەنتتى قۇرۋ جونىندەگى جوبالاردى ىسكە اسىرۋ ءۇشىن.

كونكۋرستىق وتىنىمدەر مەملەكەتتىك نەمەسە ورىس تىلدەرىندە قابىلدانادى جانە وندا تومەندەگى مالىمەت بولۋى قاجەت:

جوبانىڭ سيپاتتاماسى؛

جوبانىڭ بەينەپرەزەنتاتسياسى (60 سەكۋندتان كوپ ەمەس)؛

شىعىندار سمەتاسىنىڭ جوباسى؛

زياتكەرلىك مەنشىك تۋرالى مالىمەتتەر (بار بولسا).

قاۋلى 2021-جىلعى 20- شىلدەدەن باستاپ قولدانىسقا ەنگىزىلەدى.