قازاقستاندا «جالعىزباستى انا» تۇسىنىگى ەنگىزىلە مە
بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك كومەك ساياساتىن دامىتۋ دەپارتامەنتىنىڭ ديرەكتورى اسقار نيازوۆ ايتتى، دەپ حابارلايدى قازاقپارات ءتىلشىسى. «جالعىزباستى انا» دەپ زاڭنامالىق ايقىنداۋ، الەۋمەتتىك قورعاۋ جانە وزگە الەۋمەتتىك يگىلىك ۇسىنۋدى جاقتامايمىز. ءوز دەڭگەيىمدە مۇندايدى قولدامايتىندىعىمىزدى ايتا الامىن. تۇپتەپ كەلگەندە ءبىز ءوزىنىڭ مادەنيەتىن، وتباسىلىق قۇندىلىقتارىن، وتباسىلىق قارىم-قاتىناسىن، بالا تولىققاندى ءوسۋى ءۇشىن اكەنىڭ دە، انانىڭ دا ءتالىم-تاربيەسىن ناسيحاتتايتىن ەلمىز. بالانىڭ نەكەدەن تىس نەمەسە باسقا دا جاعدايدا دۇنيەگە كەلۋىن ىنتالاندىرماۋىمىز قاجەت. مىنە ءدال وسىعان وراي قازاقستاندا «جالعىزباستى انا» قاراستىرىلمايتىندىعىن ءوز دەڭگەيىمدە ايتا الامىن»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا ب ا ق وكىلدەرىنىڭ ساۋالىنا وراي. دەگەنمەن، دەپارتامەنت باسشىسى قازاقستاننىڭ ەڭبەك كودەكسىندە «بالانى جالعىز تاربيەلەيتىن انا»، «تولىق ەمەس وتباسى» دەگەن تۇسىنىكتەردىڭ بار ەكەندىگىنە نازار اۋدارتتى.
«بۇل اتالعان انالاردىڭ، اسىرەسە جۇمىس ىستەيتىن انالاردىڭ جۇمىس بەرۋشىلەر تاراپىنان قورعالۋى ءۇشىن، ولاردى زاڭسىز جۇمىستان شىعارىپ جىبەرمەۋى ءۇشىن جاسالعان. قاجەتتىلىك تۋىنداعان جاعدايدا يكەمدى جۇمىس كەستەسىنە اۋىسۋ مۇمكىندىگى نەمەسە قىسقارتىلعان جۇمىس كەستەسىمەن ەڭبەك ەتۋى كوزدەلگەن. بۇدان بولەك «تولىق ەمەس وتباسى» دەگەن تۇسىنىك بار. نەكە جانە وتباسى تۋرالى كودەكسكە سايكەس، جالعىزباستى انالارمەن قاتار بالاسىن جالعىز تاربيەلەپ وتىرعان اكەلەر دە بار. ولار دا تولىق ەمەس وتباسىعا جاتادى. وندا اجىراسۋدان بولەك، ومىردەگى ءتۇرلى جاعدايلارعا بايلانىستى جۇبايى ومىردەن وزىپ، بالاسىمەن قالعان ەرلەر دە كەزدەسەدى. ءبىراق، الەۋمەتتىك قورعاۋ ءۇشىن «جالعىزباستى انا» تۇسىنىگى قاراستىرىلمايدى»، - دەدى اسقار نيازوۆ.