ەلوردادا مەكتەپ تاپشىلىعى ماسەلەسى قالاي شەشىلىپ جاتىر؟

نۇر-سۇلتان. قازاقپارات - ەلوردا باسشىلىعى قالاداعى الەۋمەتتىك پروبلەمالاردىڭ ءبىرى - مەكتەپ جەتىسپەۋشىلىگىن اقىرىنداپ شەشىپ كەلەدى.

قازىرگى ۋاقىتتا نۇر-سۇلتاندا 130 وقۋ ورنى جۇمىس ىستەيدى، وندا 200 مىڭعا جۋىق وقۋشى بار. بۇل تۋرالى «حابار 24» تەلەارناسىندا كورسەتىلگەن «ءبىزدىڭ ەلوردامىز» فيلمىندە قوزعالىپ ءوتتى، دەپ حابارلايدى قازاقپارات.

2019-جىلى ەلىمىزدىڭ باس قالاسىندا ءۇش اۋىسىمدا وقيتىن سەگىز مەكتەپ بولاتىن، ال 2020-جىلى ولاردىڭ سانى ەكى ەسە ازايدى. وقۋ ورىندارىنىڭ شامادان تىس جۇمىس ىستەۋ پروبلەماسى ايتارلىقتاي ازايدى. مەملەكەت باسشىسىنىڭ تاپسىرمالارىن ورىنداۋ اياسىندا سوڭعى ەكى جىلدا قالانىڭ ءتۇرلى اۋدانىندا 12 مىڭنان استام وقۋشىعا ارنالعان 18 ءبىلىم نىسانى اشىلدى.

ەلوردادا 2021-جىلى تاعى 15 مەكتەپ مەملەكەتتىك بيۋجەت قاراجاتى ەسەبىنەن دە، مەملەكەتتىك- جەكەمەنشىك ارىپتەستىك جانە جەكە ينۆەستيتسيالار كوزىنەن دە سالىنادى.

قابىلدانىپ جاتقان شارالار ەلورداداعى مەكتەپتەردىڭ جەتىسپەۋشىلىك پروبلەماسىن شەشۋگە مۇمكىندىك بەرەدى.

«ەلوردا وسىنداي كولەمدە عانا سالىنادى دەگەن ناقتى جوسپار بەلگىلەنگەن جوق. قالامىز كۇن ساناپ ءوسىپ كەلەدى، تيىسىنشە مەكتەپتەر جەتىسپەيدى. ايتا كەتەرلىك ماسەلە، تاپشىلىقتى ازايتۋ قاجەت. بۇل قيىندىقتىڭ الدىن الۋ ءۇشىن كوبىرەك مەكتەپ سالىنىپ جاتىر. قازىرگى نۇر-سۇلتان ەندىگى 20 جىلدان كەيىن ۇلكەيىپ، اۋەجايىمىز لوندونداعىداي قالا ورتالىعىندا بولۋى مۇمكىن. قالانىڭ ءوسىپ كەلە جاتقانىن سەزىنۋ كەرەك. اكىمدىك اتقارىپ جاتقان شارۋالارعا كوز سالساق، ءبارى دەر كەزىندە جۇرگىزىلىپ جاتقانىن بايقاۋعا بولادى. بيىل 16 مەكتەپ سالىنادى، بۇل ۇلكەن جەتىستىك دەپ سانايمىن»، - دەپ اتاپ ءوتتى ساياساتتانۋشى سامات نۇرتازا.

ەسكە سالا كەتەيىك، جاقىندا ەلوردادا بىرنەشە الەۋمەتتىك نىسان اشىلدى. ولاردىڭ اراسىندا كوزى ناشار كورەتىن بالالارعا ارنالعان مامانداندىرىلعان بالاباقشا دا بار. بالاباقشادا تاربيەشىلەرمەن قاتار مەديتسينا قىزمەتكەرلەرى دە جۇمىس ىستەيدى. بۇل بالانىڭ فيزيكالىق، پسيحيكالىق دامۋ ەرەكشەلىكتەرىن، جەكە مۇمكىندىكتەرى مەن قابىلەتتەرىن ەسكەرە وتىرىپ، بالانى جان-جاقتى دامىتۋعا، مەكتەپكە دايىندىعىن قامتاماسىز ەتەدى. مەكەمەدە فيزيوتەراپيا، لوگوپەد-دەفەكتولوگ، وفتالمولوگ جانە باسقا كابينەتتەر بار.

وسىعان دەيىن ەلوردا اكىمى التاي كولگىنوۆ قالادا وقۋ ورىندارىنىڭ قۇرىلىسىنا ءجىتى كوڭىل بولىنەتىنىن اتاپ وتكەن بولاتىن.

«مىسالى الماتى اۋدانىندا 2400 ورىندىق مەكتەپ سالىنىپ، اشىلۋعا دايىن (ەكى اۋىسىمدا؛ مايقايىڭ مەن ا351 كوشەلەرىنىڭ قيىلىسى). وقۋ ورنىندا ينكليۋزيا، «اباي تانۋ»، «STEM»، «ينتەللەكتۋم» كابينەتتەرى جانە بەينەساباقتاردى تۇسىرۋگە ارنالعان ستۋديا بار. بۇل بالالاردىڭ جان-جاقتى دامۋىنا مۇمكىندىك بەرەدى. ەلوردادا الداعى 5 جىلعا 67 مەكتەپتىڭ قۇرىلىسى جوسپارلانىپ وتىر. وقۋ ورىندارىنىڭ قۇرىلىسىنا دا جەكە ينۆەستيتسيا تارتىلادى»، - دەدى اكىم.