ايماق باسشىسى الدىمەن جامبىل اۋدانى اۋماعىندا ورنالاسقان اقىرتاس كەشەنىنە توقتادى. مەملەكەتتىڭ قورعاۋىنا الىنعان تۋريستىك نىساندى جەرگىلىكتى بيلىك كەلۋشىلەرگە قولجەتىمدى ەتۋ ءۇشىن ءبىرقاتار جۇمىستار جۇرگىزۋدە. بۇگىندە نەگىزگى اۆتوماگيسترالدان نىسانعا اسفالت جول تارتىلعان دەسەك، ينفراقۇرىلىمعا قاتىستى باسقا دا ماسەلەلەر شەشىمىن تابۋدا.
«ەجەلگى تاراز ەسكەرتكىشتەرى» مەملەكەتتىك تاريحي- مادەني مۋزەي- قورىعىنىڭ ديرەكتورى نۇرلان بىقىبايەۆ جانە ونىڭ ورىنباسارى اننا كروكوشيەۆا وبلىس اكىمىنە كەشەننىڭ تاريحى تۋرالى بايانداپ، ونىڭ تۋريستىك تارتىمدىلىعىن ارتتىرۋ بويىنشا كەيبىر ماسەلەلەردى اتاپ ءوتتى. سونىڭ ءبىرى - اقىرتاس تاريحي- مادەني كەشەنىن سۋمەن قامتاماسىز ەتۋ.
نۇرلان بىقىبايەۆتىڭ ايتۋىنشا، بۇل ماسەلەنى تاۋ بۇلاقتارىن پايدالانۋ ارقىلى شەشۋگە بولادى. ءتيىستى جوبا ازىرلەنگەن، تەك قارجىلاندىرۋ قاجەت. بەردىبەك ساپاربايەۆ بۇل جوبانى قولدايتىندىعىن ءبىلدىرىپ، تەك ونى الدىمەن جان- جاقتى قاراستىرىپ، ەگجەي- تەگجەيلى ناقتىلاۋدىڭ ماڭىزدىلىعىن العا تارتتى.
بۇدان سوڭ وبلىس اكىمى جولاي ەجەلگى اقتوبە (بالاساعۇن) قالاشىعىنا ارنايى بۇرىلدى. شۋ اۋدانى اۋماعىندا ورنالاسقان بۇل نىساندى زەرتتەۋ جۇمىستارى بىرنەشە جىلدان بەرى جۇرگىزىلۋدە. ءبىراق قازىر ول جۇمىستار كوروناۆيرۋسقا بايلانىستى ۋاقىتشا توقتاپ تۇر. سالا ماماندارى ارحەولوگيالىق قازبا جۇمىستارى مىندەتتى تۇردە جالعاسادى دەپ سەندىردى. مۇنداعى باستى ماسەلەنىڭ ءبىرى - قالاشىققا اپارار جاقسى جولدىڭ جوقتىعى. ول ءۇشىن ءتيىستى زەردەلەۋ جۇمىسى جۇرگىزىلەدى.
اۆتور: سايا سەمباي