سىنامالى جوباعا ازىرشە 122 ادام قاتىسادى. ءۇش جىل بويى جوباعا قاتىسۋشىلاردىڭ بانك كارتوچكالارىنا اي سايىن 1200 ەۋرو ءتۇسىپ وتىرادى. ياعني ءارقايسىسى 43 مىڭ ەۋرو الادى.
بۇل ءۇشىن نە ىستەۋ قاجەت؟ ەشتەڭە! تەك كەيدە انكەتالاردى تولتىرىپ، قوسىمشا تابىس ءومىرىن قالاي وزگەرتكەنى جايلى جازۋى كەرەك. تاجىريبەگە كاسىبى مەن تابىسىنا قاراماستان گەرمانيانىڭ 21 جاستان اسقان كەز كەلگەن تۇرعىنىنا قاتىسۋعا بولاتىن. اۋادان اقشا العاندى قالايتىندار كوپ بولىپ شىقتى. باستاپقى ءۇش كۇندە ءبىر ميلليوننان استام سۇرانىس تۇسكەن. الايدا اقتىق ىرىكتەۋدەن 122 ادام عانا ءوتتى.
ميحاەل بومەەر، جوبانىڭ نەگىزىن قالاۋشى:
- ىرىكتەۋدەن ورتاشا كولەمدەگى جالاقى الاتىن جانە جالعىز تۇراتىن 21-40 جاس ارالىعىنداعى ادامدار ءوتتى. ءبىز قوسىمشا تابىس قوعامعا قانشالىقتى پايدالى بولاتىنىن بىلگىمىز كەلەدى. اتاپ كەتۋ كەرەك، تاجىريبەمىزگە اقشاعا مۇقتاج ەمەس نەمەسە جالاقىسى جاقسى ادامدار دا قاتىسىپ جاتىر.
جوبا ۇيىمداستىرۋشىلارى قوسىمشا تابىستىڭ ادامعا، ونىڭ ادەتىنە، ەڭ باستىسى - كوڭىل- كۇيىنە قالاي اسەر ەتەتىنىن زەرتتەمەك. قاتىسۋشىلار اقشاسى كوبەيسە، باقىتتى بولا ما جانە دە بۇل ولاردى ءوزىن- ءوزى دامىتۋعا نەمەسە قايىرىمدىلىققا يتەرمەلەي مە؟ وسىنىڭ بارلىعىن عالىمدارعا پيلوتتىق جوبا اياسىندا انىقتاۋعا تۋرا كەلەدى.
ميحاەل بومەەر، جوبانىڭ نەگىزىن قالاۋشى:
- ناتيجەلەردى انكەتا جانە سۇحباتتىڭ كومەگىمەن الۋدى كوزدەيمىز. وعان قوسا ءبىز كورتيزولا دەڭگەيىن - سترەسس گورموندارىن تالداۋ ءۇشىن شاش ۇلگىلەرىن العىمىز كەلەدى.
الەمدە كوپتەگەن ۇقساس ەكسپەريمەنتتەر وتكىزىلگەن. مىسالى، عالىمدار قوسىمشا تابىستىڭ ارقاسىندا ادامداردىڭ ودان دا ءتيىمدى جۇمىس ىستەي باستاعانىن انىقتادى. سونىمەن قاتار پسيحيكالىق جانە ەموتسيونالدى جاعدايى جاقسارا تۇسەدى. بۇل ادامنىڭ وزىندىك دامۋىنا دا اسەر ەتەدى.
بۇل تاجىريبە دەمەۋشىلەردىڭ كومەگىمەن ىسكە استى. 180 مىڭ ادام جوبانى قولداپ، كەلەر ءۇش جىلدا دا قارجىلاندىرۋدى ۇيعارعان. ەگەر دەمەۋشىلەر سانى وسە تۇسسە، ۇيىمداستىرۋشىلار ودان دا كوپ اقشا تاراتۋعا ۋادە بەرىپ وتىر.
www.24.kz