ماكرون راديكالدى كوزقاراستاعى ادامداردىڭ قوعامنىڭ نازارىن وزىنە اۋدارۋعا جول بەرمەۋ كەرەكتىگىن ايتتى. ال وسى ەلدىڭ پرەمەر- ءمينيسترى جان كاستەكس پرەزيدەنت ماكرونعا قول كوتەرۋدى دەموكراتيانى قورلاۋ دەپ، ونى ايىپتاۋعا شاقىردى.
جان كاستەكس، فرانسيا پرەمەر- ءمينيسترى:
پرەزيدەنت ەممانۋەل ماكرونعا جاسالعان شابۋىلعا بايلانىستى ەلگە مىنانى ايتقىم كەلەدى. مەملەكەت باسشىسىنا قول جۇمساۋ دەمكوراتيانى قورلاۋ دەر ەدىم. دەموكراتيا بۇل اشىق پىكىرسايىس، ديالوگ، زاڭدى تۇردە پىكىر ءبىلدىرۋ. سوندىقتان اشىق قوعامدا كۇش قولدانىپ، تىلمەن جابىرلەۋگە جول بەرىلمەۋى ءتيىس. پرەزيدەنتكە قاتىستى وقيعا ءبارىمىزدى الاڭداتىپ وتىر. ءبىز مۇنداي وشپەندىلىك ارەكەتتەردى ايىپتاۋىمىز كەرەك.
ەسكە سالا كەتەيىك، پرەزيدەنت ەممانۋەل ماكرونمەن وقىس وقيعا كەشە وسى ەلدىڭ دروم دەپارتامەنتىندە بولدى. مەملەكەت باسشىسى كوروناۆيرۋستان جاپا شەككەن مەيرامحانا سالاسىنىڭ وكىلدەرىمەن كەزدەسۋ ءۇشىن كولىكتەن شىعىپ قورشاۋمەن بولىنگەن ءبىر توپ ادامعا جاقىندايدى. وسى كەزدە ءبىر ەر ادام ماكروندى قولىنان ۇستاپ تۇرىپ، بەتىنەن شاپالاقپەن تارتىپ جىبەرەدى. پرەزيدەنت كۇزەتى شاپشاڭ قيمىلداپ، بۇزاقىنى ۇستايدى. ىسكە قاتىستى ەكى ادام قامالدى. مەملەكەت باسشىسىنا قول كوتەرگەن ادام باس بوستاندىعىنان ايىرىلىپ، 45 مىڭ ەۋرو ايىپپۇل تولەۋى مۇمكىن.