بۇل ماسەلەگە قاتىستى ادىلەت ءمينيسترى مارات بەكەتايەۆ تۇسىنىك بەردى، دەپ حابارلايدى قازاقپارات ءتىلشىسى.
«بۇل تۇرعىدا راقىمشىلىق جاساۋ تۋرالى قۇجاتتىڭ ناقتى باپتارىنا بايلانىستى. وتكەن جىلدارداعى تاجىريبەگە توقتالساق، قاسكوي قىلمىسكەرلەر راقىمشىلىق ءىس-شارالارىمەن قامتىلمادى جانە بىزدە سىبايلاس جەمقورلار ءۇشىن جازا بويىنشا ەرەكشە نورمالار بار. سوندىقتان وسى سالالاردا امنيستياعا بايلانىستى قانداي دا ءبىر جاعدايدىڭ ۋشىعۋى بولادى دەپ توپشىلاۋ دۇرىس ەمەس. سەبەبى بۇل زاڭ جوباسىن دايىنداۋعا قاتىساتىن زاڭ شىعارۋشىلار مەن قۇقىق قورعاۋ ورگاندارى بارلىق جاعداي مەن فاكتورلاردى نازارعا الادى»، - دەدى م. بەكەتايەۆ ورتالىق كوممۋنيكاتسيالار قىزمەتىندە.
ەسكە سالا كەتەيىك، بيىل اقپان ايىندا ق ر ىشكى ىستەر مينيسترلىگى «راقىمشىلىق جاساۋ تۋرالى» قازاقستان رەسپۋبليكاسىنىڭ زاڭ جوباسىن قوعام تالقىلاۋىنا ۇسىندى.
بىلتىرعى 29 - قازاندا ىشكى ىستەر مينيسترلىگىنىڭ كەڭەيتىلگەن القا ماجىلىسىنە قاتىسقان پرەزيدەنت قاسىم-جومارت توقايەۆ قازاقستان تاۋەلسىزدىگىنىڭ 30 جىلدىعىنا وراي، ازاماتتارعا جانە جالپى مەملەكەتكە قاۋىپ كەلتىرمەيتىن قىلمىس جاساعان ادامدارعا امنيستيا جاسالاتىنىن جەتكىزدى.
جاقىندا ىشكى ىستەر مينيسترلىگى راقىمشىلىققا ىلىنبەيتىن سوتتالعانداردىڭ ساناتىن اتادى.