الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 3- مامىر كۇنى ساعات 17:40 شاماسىندا ەڭبەكشىقازاق اۋدانىنىڭ پوليتسياسىنا كولىكتىڭ ورتەنگەنى جونىندە حابارلاما تۇسكەن.
«كولىكتىڭ ىشىندە ەكى ايەل ادام جانىپ كەتتى. وقيعا ورنىندا تەرگەۋ توبى جۇمىس ىستەپ جاتىر. بۇل فاكتى بويىنشا ارنايى ساراپتاما تاعايىندالدى. سوتقا دەيىنگى تەرگەۋ جۇرگىزىلىپ جاتىر»، - دەپ پىكىر ءبىلدىردى اتالعان ۆەدومستۆونىڭ باسپا ءسوز قىزمەتىنەن.
ەستەرىڭىزگە سالا كەتەيىك، بۇعان دەيىن كولىكتىڭ سالونىندا ەكى ادامنىڭ تىرىدەي ورتەنگەنىن حابارلاعان بولاتىنبىز. وقيعا ورنىنان ۆيدەو تۇسىرگەن كۋاگەرلەردىڭ سوزىنشە، كولىك قىزىل جالىنعا ورانعاندا ەكى ايەل ىشىندە ۇيىقتاپ جاتقان. ولار ءتىلسىز جاۋدان قۇتىلا الماي، وقيعا ورنىندا تىرىدەي جانىپ كەتكەن.
«ماشينا ورتەنىپ، ىشىندە ەكى كەلىنشەك قالىپ، جانىپ كەتتى. ەشقانداي كومەك بولمادى. جۇرگىزۋشى اشقاندا ول ارى قاراي قاشىپتى. بەرى قاراي تارتىپ ەدىم، وت شىعىپ ەدى ارى قاراي قاشتى. بۇلار ۇيىقتاپ قالعان عوي» دەلىنگەن بەينەجازبادا.
ال قۇتقارۋشىلار دەر كەزىندە وقيعا ورنىنا جەتە الماعان. سەبەبى، جاقىن ماڭدا ءورت ءسوندىرۋ قىزمەتى بولماعان. قىزىل جالىننىڭ شىعۋ سەبەبى انىقتالىپ جاتىر. كەشە كەشكىسىن ساعات التى شاماسىندا بولعان وقيعا ورنىنا الماتى وبلىستىق توتەنشە جاعدايلار دەپارتامەنتىنىڭ ءورت- سىناق زەرتحاناسى جۇمىلدىرىلدى. وقيعانىڭ ءمان- جايىن ءتيىستى ورگاندار انىقتاپ جاتىر.
ماماندار اپتاپ ىستىقتا ازاماتتاردان ءورت قاۋىپسىزدىگى ەرەجەلەرىن ساقتاۋدى سۇرايدى. جولعا شىققاندا كولىكتى تەحنيكالىق تەكسەرۋدەن وتكىزۋگە كەڭەس بەرەدى.
«شاقىرۋ ورنىنا الماتى وبلىسى ت ج د 4 قىزمەتكەرى مەن 1 تەحنيكا شىقتى. جانعان جەردەن ءورت ءسوندىرۋ بولىمىنە دەيىنگى قاشىقتىق 45 ك م قۇرادى. ءورت ورنىندا اۆتوكولىك سالونىندا 2 جولاۋشىنىڭ جانىپ كەتكەن دەنەسى تابىلدى» دەدى الماتى وبلىستىق ت ج د باسپا ءسوز قىزمەتىنىڭ رەسمي وكىلى ازامات جۇرتبايەۆ.
اۆتور: سامال قابىشيەۆا