ۆاكسينا السا دا، ۆيرۋس جۇقتىرۋدىڭ سەبەبىن يممۋنولوگ ءتۇسىندىردى

نۇر- سۇلتان. قازاقپارات - دەنساۋلىق مينيسترلىگى وتكىزگەن ونلاين دارىستە اللەرگولوگ- يممۋنولوگ رافايل روزەنسون ۆاكسينا العاننان كەيىن دە ۆيرۋس جۇقتىرۋدىڭ سەبەبىن ءتۇسىندىردى، دەپ حابارلايدى قازاقپارات.

«ۆاكسينانىڭ ءبىرىنشى كومپونەنتىن الىپ، اۋرۋ جۇقتىرعاندار تۋرالى كوپ وقىپ تا، ەستىپ تە ءجۇرمىز. ونداي جولى بولماعاندار بىرەن- ساران عانا. ونداي ادامدار ەكپە الماي تۇرىپ اۋرۋ جۇقتىرعان. وسىنى ءتۇسىنۋ كەرەك. ول ۆيرۋستى ۆاكسينا الماي تۇرىپ كەزدەستىردى دەگەن ءسوز. سوندىقتان، ۆاكسينا السا دا اۋىرعان. ونداي ادامداردىڭ دا ومىرمەن قوشتاسۋى وتە سيرەك بولادى. ءبىر- ەكى جاعداي بولعانىن مەن دە ەستىدىم. ۆاكسينا العاننان كەيىن، اۋىرىپ، كوز جۇمعان. ءبىراق بۇلار ىلەسپە اۋرۋلارى كوپ، ەگدە ادامدار ەدى»، - دەگەن دارىگەر ۆاكسينا العاننان كەيىن كەمىندە 10 كۇن ساقتانىپ ءجۇرۋ كەرەكتىگىن ەسكەرتتى.

«ەگەر ادام ۆاكسينا العاننان كەيىن تىم قۇرىعاندا 10 كۇن وتكەن سوڭ ۆيرۋستى جولىقتىرعان بولسا، مۇنداي قايعىلى جاعداي بولماۋشى ەدى. ۆاكسينا العاننان كەيىن ۆيرۋس نەعۇرلىم كەش جولىقسا، اعزاعا سوعۇرلىم جەڭىل بولادى. ۆاكسينا ءبىرىنشى كۇننەن باستاپ قاۋىپسىزدىككە كەپىل بولا المايدى. ەكپە الدىڭ با، العاشقى 10 كۇندە ۇيدەن شىقپا، ۆاكسيناعا انتيدەنە قالىپتاستىرىپ ال»، - دەيدى مامان.

رافايل روزەنسون بۇعان دەيى ۆاكسينا العانان كەيىن قايتىس بولعان ادامداردىڭ ەشبىرىندە ۆاكسينانى اۋرۋدى بەلسەندىرگەنى تۋرالى دالەل جوق دەگەن پىكىر ايتتى.

«كوبىنەسە ادامدار ەكى فاكتوردان كوز جۇمعان. نە قان قۇرامىنداعى سيتوكيندەردىڭ كۇرت ارتۋىنان، نە تامىر ىشىندە قاننىڭ بەلسەندى ۇيۋىنان قايتىس بولعان. اتالعان اقاۋلاردى ۆاكسينا تۋعىزعانى تۋرالى ءبىر دە ءبىر دالەل جوق. ال ادام ۆاكسينا العاننان كەيىن 14 كۇن وتكەن كەزدە ۆيرۋس جۇقتىرسا ينفەكسيا الدەقايدا جەڭىل وتەدى»، - دەدى ساراپشى.

اۆتور: ەسىمجان ناقتىباي