اسىق ويىنىنا بايلانىستى ىرىمدار
ويىننىڭ نەگىزگى وبەكتىسى دە، قۇرالى دا - اسىق.
قازاقى ورتادا اسىقتىڭ مالدىڭ اناتومياسى مەن فيزيولوگياسىنداعى ماڭىزى مەن ءرولى جوعارى باعالاعانى ايقىن اڭعارىلادى. ونىڭ ۇستىنە، سۇيەكتىڭ وسى ءبىر مۇشەسىنىڭ ايرىقشا شىمىرلىعى مەن مىقتىلىعى جانە وزىندىك ەستەتيكاسى ونى العىرلىقتىڭ، ۇيلەسىمدىلىك پەن توزىمدىلىكتىڭ، اقجولتايلىقتىڭ دا سيمۆولىنا اينالدىردى. تىلىمىزدە ەجەلدەن ورنىققان «قوي اسىعى دەمەڭىز، قولايىڭا جاقسا ساقا عوي» نەمەسە «بۇگە-شۇگەسىن شىعارۋ»، «بۇگە-شۇگەسىنە دەيىن ءبىلۋ»، «اسىعى الشىسىنان ءتۇسۋ»، «التىن اسىقتاي»، «كيىكتىڭ اسىعىنداي» دەپ كەلەتىن سان الۋان تۇراقتى ءسوز تىركەستەرى اسىقتىڭ وسىنداي ايرىقشا سيمۆولدىق مانىنە بايلانىستى قالىپتاسقان.
جالپى قازاق حالقى ءوزى قۇرمەت تۇتقان قۇندى زاتتى عۇرىپ پەن ىرىمعا اينالدىرا بىلگەن جۇرت. سان عاسىرلىق قولدانىسى بار اسىقتى دا عۇرىپقا اينالدىرعان.
ماسەلەن مال تولدەپ جاتقاندا، بالالاردىڭ اسىق ويناۋىنا تىيىم سالعان. ويتكەنى وسىنداي ساتتە ويناۋ مالدىڭ كيەسىن مازاقتاۋ دەپ ەسەپتەگەن. ياعني، مال يەسىن شامداندىرادى دەپ سەنگەن. سالدارى ءتول شىعىنىنا ۇشىراتادى دەپ بولجاعان.
«التى جىل اش بولساڭ دا اسىق ەتىن مۇجىمە، توق بولساڭ دا توبىق ءمۇجى» دەگەن ءسوز بار ەلدە.
حالىق تانىمىنشا، اسىقتى ءمۇجۋ - ناشار ادەت، جات قىلىق. ەلدى مولشىلىقتان ايىرادى دەپ توپشىلاعان. اسىق مۇجىگەن جۇرتتىڭ ەل- دالاسى جازدا قۋاڭ، قىستا جۇت بولادى، قىرسىق شاقىرادى دەسەدى. قۋارعان اسىق قۋارعان جازدى ەسكە سالسا كەرەك. قۋارعان اسىق قۋارعان اپاتتى شاقىرادى دەپ عۇرىپتىق ارەكەتكە اينالدىرعان كورىنەدى.
اسىقتى جىلىكتى مۇجۋگە بولادى. ءبىراق تولىق، مۇقيات ءمۇجۋ كەرەك. ۇل بالا اسىق جىلىكتى دۇرىس مۇجىمەسە، شالا-شارپى قالدىرسا، بولاشاق قالىڭدىعى سالاق، بالاسى قوجىر-قوتىر بولادى- مىس.
massaget.kz