كوروناۆيرۋس: تۇركيادا كومەندانتتىق ساعات قىسقارىپ، يزرايل بارلىق شەكتەۋدى الىپ تاستادى
تۇركيادا كارانتيندىك شارالار جەڭىلدەتىلدى. ەل پرەزيدەنت رەجەپ تايىپ ەردوعان 1-ماۋسىمنان باستاپ ەلدەگى كومەندانتتىق ساعاتتىڭ قىسقارعانىن جاريالادى. ءدامحانالار مەن مەيرامحانالار كەلۋشىلەردى بۇگىننەن باستاپ قابىلدايدى.
مەملەكەت باسشىسىنىڭ ايتۋىنشا، كومەندانتتىق ساعات جۇمىس جانە سەنبى كۇندەرى ساعات 22:00-دەن 05:00-گە دەيىن، جەكسەنبىدە تاۋلىك بويى كۇشىندە بولادى.
فرانسيادا كۆي قارسى ۆاكتسيناتسيالاۋ شارالارىنا قاتىستى ەنگىزىلگەن قوسىمشا شەكتەۋلەر الىنىپ تاستالدى. دۇيسەنبىدەن باستاپ فرانسيانىڭ كەز- كەلگەن ەرەسەك تۇرعىنى قوسىمشا شەكتەۋسىز ەكپە الۋعا جازىلا الادى. رەسمي تۇردە فرانسيادا كەز- كەلگەن ءدارىحانادا ەكپە سالدىرۋعا بولادى. شىلدە ايىنا قاراي ەۋروپالىق وداقتا وعان مۇشە ەلدەر اراسىندا ساياحاتتاۋ ءۇشىن «جاسىل ءتولقۇجات» ەنگىزىلۋى كەرەك. وسى رەتتە كوپتەگەن ادامدار دەمالىس الدىندا ۆاكسينا سالدىرۋعا اسىعۋدا.
يزرايلدە 1-ماۋسىمنان باستاپ كوروناۆيرۋستىق پاندەمياعا بايلانىستى بۇرىن ەنگىزىلگەن بارلىق شەكتەۋلەر الىنىپ تاستالدى. تەك جابىق جەرلەردەگى قوعامدىق ورىنداردا بەتپەردە كيۋ تالابى مەن ەلگە كىرۋشىلەرگە كارانتين كەزىندە قويىلاتىن تالاپتاردىڭ كۇشى جويىلعان جوق.
سونىمەن قاتار، جينالىستارعا قاتىسۋشىلاردىڭ سانىنا قاتىستى بارلىق شەكتەۋلەر الىنىپ تاستالادى. مۇنىمەن قوسا، يزرايلدىكتەرگە بۇدان بىلاي ءبىر جەرگە كىرۋ ءۇشىن ۆاكتسيناتسيا تۋرالى نەمەسە COVID-19-دان ساۋىعۋ تۋرالى قۇجاتتى ۇسىنۋ قاجەت ەمەس.
يزرايل ءبىرقاتار ەلدەرگە، ونىڭ ىشىندە قازىرگى ۋاقىتتا ەپيدەميولوگيالىق قاۋىپ- قاتەر بويىنشا «قىزىل ايماقتاعى» رەسەي ازاماتتارىنىڭ ەل اۋماعىنا كىرۋىنە شەكتەۋلەردى العان جوق.
يزرايلگە كەلگەندەر مەملەكەت اۋماعىنا كىرۋ كەزىندە كوروناۆيرۋسقا تەست تاپسىرۋى، ۇشۋدان 72 ساعات بۇرىن جاسالعان تاعى ءبىر تەستتىڭ ناتيجەلەرىن ۇسىنۋى كەرەك.