اۋىل اكىمدەرى ەكى مەرزىمگە عانا سايلانا الادى
سايلاۋ تۋرالى كونستيتۋتسيالىق زاڭعا ەنگىزىلگەن تۇزەتۋلەر وسىنداي باپپەن تولىققان، دەپ حابارلايدى قازاقپارات ءتىلشىسى.
بۇل تۋرالى پرەزيدەنت اكىمشىلىگى جەتەكشىسىنىڭ ورىنباسارى مالىك مۋرزالين حابار-24 ارناسىنا بەرگەن سۇحباتىنا ايتتى.
«ءبىر ادام ەكى رەتتەن ارتىق اۋىل اكىمى بولا المايتىنىن ماڭىزدى ەرەجە دەۋگە بولادى. سونىمەن بىرگە، اكىم پارتياعا مۇشەلىكتەن ايىرىلسا، جەرگىلىكتى ءماسليحات سەنىمسىزدىك تانىتقان جاعدايدا نەمەسە مەملەكەتتىك قىزمەت تۋرالى زاڭمەن بايلانىستى وزگە دە پروبلەمالارعا تاپ بولسا، ءوز لاۋازىمىن تاپسىرۋعا ءماجبۇر بولادى»، - دەدى پرەزيدەنت اكىمشىلىگىنىڭ وكىلى.
ول، سونداي- اق، اكىم سايلاۋىنا جاسى 25 تەن اسقان كەز كەلگەن قازاقستان ازاماتى كانديدات رەتىندە قاتىسا الاتىنىن ايتتى.
بۇل ءۇشىن مەملەكەتتىك قىزمەت تۋرالى زاڭنىڭ تالاپتارىنا ساي بولۋ كەرەك.
ەسكە سالساق، پرەزيدەنت قاسىم- جومارت توقايەۆ سايلاۋ تۋرالى كونستيتۋتسيالىق زاڭعا وزگەرتۋلەر مەن تولىقتىرۋلار ەنگىزۋدى كوزدەيتىن قۇجاتقا قول قويعان بولاتىن.