جانسايا مۋسينا اقتاۋداعى الامان ايتىستا باس جۇلدەنى يەلەندى

اقتاۋ. قازاقپارات - ەكى كۇن بويى ماڭعىستاۋ دالاسىن وتتى ولەڭ- جىرعا بولەگەن رەسپۋبليكالىق اقىندار ايتىسى مارەسىنە جەتتى.

ەل تاۋەلسىزدىگىنىڭ 30 -جىلدىعىنا وراي «Nur Otan» پارتياسىنىڭ قولداۋىمەن وتكىزىلگەن ءسوز سايىسىنا ەلىمىزدىڭ ءار وڭىرىنەن 18 اقىن قاتىستى، دەپ حابارلايدى قازاقپارات ءتىلشىسى.

ايتىستى قازاقستاننىڭ ەڭبەك سىڭىرگەن قايراتكەرى، بەلگىلى اقىن ءجۇرسىن ەرمان جۇرگىزسە، سۆەتقالي نۇرجان، عالىم جايلىباي، ادىلەت قابىلوۆ، باۋىرجان حاليوللا، سۇلتانبەك قۇدايبەرگەن باستاعان ەل اعالارى قازىلىق ەتتى. ءدۇبىرلى دودانى تاماشالاۋعا كەلگەن ماڭعىستاۋ وبلىسىنىڭ اكىمى سەرىكباي ترۇموۆ ونەر سۇيەر قاۋىمعا تاماشا ايتىس كەشىن سىيلاعان اقىندارعا العىسىن ايتتى.

«بيىل ەلىمىز ءۇشىن ەرەكشە جىل - قاستەرلى تاۋەلسىزدىگىمىزگە 30 جىل تولىپ وتىر. وتىز جىلدىق مەرەيتويدى ۇلتتىق ونەر ارقىلى ۇلىقتاپ جاتىرمىز. وسىناۋ مەرەكەنىڭ جوعارى دەڭگەيدە وتۋىنە ۇلەسىن قوسقان بارشا جانعا العىس ايتامىن. بۇل ايتىستاعى ەڭ جاس اقىنىمىز الشىن بالامىزدىڭ دا ونەرىنە ءتانتى بولدىق. ءسوز شەبەرلىگىمەن كورەرمەننىڭ كوزايىمىنا بولەندى. الشىن ماڭعىستاۋ وبلىسىنداعى «جىر جەبە» اقىندار مەكتەبىنىڭ وقۋشىسى. بۇل مەكتەپ 6 جىل بۇرىن قۇرىلعان بولاتىن. باسىندا نۇرلان مۇسايەۆ نەگىزىن قالاپ، جۇمىسىن باستاعان مەكتەپتى بۇگىندە فارحاد مۇسايەۆ باسقارىپ، جاس ايتىسكەرلەردى باۋلىپ كەلەدى. ايگىلى اقىندارىمىزدىڭ جولىن جالعاپ كەلە جاتقان جاستارعا ەڭبەكتەرىڭىز جانا بەرسىن دەگىم كەلەدى»، - دەدى س. ترۇموۆ.

قازىلار القاسىنىڭ شەشىمىمەن ايتىستىڭ ەكىنشى كەزەڭىنە ءتورت جۇپ ىرىكتەلدى. الماتىلىق قازىرەت بەردىحان مەن باتىسقازاقستاندىق جانسايا مۋسينا، ماڭعىستاۋلىق نۇرلان مۇسايەۆ پەن پاۆلودارلىق اسپانبەك شۇعاتايەۆ، ماڭعىستاۋلىق اباي جولماعانبەتوۆ پەن اتىراۋلىق شالقارباي ءىزباساروۆ، قاراعاندىلىق تولەگەن جامانوۆ پەن ماڭعىستاۋلىق ارعىنبەك قالبايەۆتار جۇپتاسىپ ايتىستى.

قازىلار القاسىنىڭ شەشىمىمەن توپتان وزا شاپقان باتىس قازاقستان وبلىسىنىڭ اقىن قىزى جانسايا مۋسينا باس جۇلدە يەگەرى اتانىپ، وعان 2 ميلليون تەڭگەنىڭ سەرتيفيكاتى تابىستالدى.

ءبىرىنشى ورىنعا ماڭعىستاۋ وبلىسى جاڭاوزەن قالاسىنىڭ جاس اقىنى ارعىنبەك قالبايەۆ لايىق دەپ تانىلىپ، ول 1 ميلليون تەڭگەنى قانجىعاسىنا بايلادى.

جۇلدەلى ەكىنشى ورىنعا قاراعاندى وبلىسىنان كەلگەن تولەگەن جامانوۆ، الماتى وبلىسىنان قازىرەت بەردىحان جانە ماڭعىستاۋلىق نۇرلان مۇسايەۆ تابان تىرەپ، ءارقايسىسىنا 600 مىڭ تەڭگەدەن بەرىلدى.

ال، ءۇشىنشى ورىن پاۆلودار وبلىسىنىڭ اقىنى اسپانبەك شۇعاتايەۆقا، ماڭعىستاۋ وبلىسىنىڭ اقىنى اباي جولماعانبەتوۆكە جانە اتىراۋلىق اقىن شالقارباي ءىزباساروۆقا بۇيىردى. ءارقايسىسى 500 مىڭ تەڭگەدەن يەلەندى. سونىمەن قاتار، ارنايى جۇلدەمەن باتىسقازاقستاندىق تالعات مىقي، اقتوبەلىك مارات احمەتوۆ، ماڭعىستاۋلىق الشىن سۋەموۆ ماراپاتتالىپ، 300 مىڭ تەڭگەدەن اقشالاي سىيلىققا يە بولدى.

العىس حاتپەن جانە 200 مىڭ تەڭگە اقشالاي سىيلىقپەن سەمەيلىك اقىن رۇستەم قايىرتاي ۇلى، شىمكەنت قالاسىنان ءبىرجان بايتۋوۆ، قوستانايلىق توبا وتەپبايەۆ، قاراعاندىلىق تىلەگەن ءادىلوۆ، ماڭعىستاۋلىق ازامات ورىنباساروۆ، رايىمبەك تۇزەلوۆ، زەينەتوللا قوسىمبايەۆتار ماراپاتتالدى.