مينيستر جاس ماماندارعا: ۇلتتىق بىلىكتىلىك تەستىن تاپسىرماي پەداگوگ بولا المايسىزدار

نۇر-سۇلتان. قازاقپارات - ق ر ءبىلىم جانە عىلىم ءمينيسترى اسحات ايماعامبەتوۆ ەندىگى ۋاقىتتا ۇمىتكەرلەر مۇعالىمدىككە ۇلتتىق بىلىكتىلىك تەستىن تاپسىرۋ ارقىلى عانا قابىلداناتىنىن ايتتى، دەپ حابارلايدى قازاقپارات ءتىلشىسى.

«سەرتيفيكاتتاۋ دا - ماڭىزدى ماسەلە. 338№ بۇيرىققا وزگەرىستەر ەنگىزىلىپ جاتىر. بيىل عانا بىتىرگەن، مۇنىڭ الدىندا ءبىلىم ورداسىندا جۇمىس ىستەمەگەن، قاتارىمىزعا جاڭادان قوسىلاتىن ارىپتەستەرىمىز ەندى مەكتەپكە بىردەن كەلە المايدى. ۇلتتىق بىلىكتىلىك تەستىلەۋىن تاپسىرىپ، ءتيىستى باللدى جيناعاندار عانا جۇمىسقا الىنادى. ول سەرتيفيكاتتاۋ دەپ اتالادى. مەكتەپكە كەلگەننەن كەيىن دە كوميسسياعا ساباعىن كورسەتىپ، تەك ديپلومى عانا ەمەس، ونىڭ ارتىندا ءبىلىمى، تاجىريبەسى بار ەكەندىگىن دالەلدەيدى. بۇل العاش رەت پەداگوگيكالىق ماماندىققا كەلىپ وتىرعان ادامدارعا عانا قاتىستى. مۇنىڭ الدىندا جۇمىس ىستەپ جۇرگەن ادامدارعا قاتىستى ەمەس. سىزدەرگە بۇل ماسەلەنى قاداپ تۇرىپ، جاقسىلاپ تۇرىپ ايتامىن. ەرتەڭ تۇسىنبەۋشىلىك بولماسىن»، - دەپ ەسكەرتتى اسحات ايماعامبەتوۆ رەسپۋبليكالىق پەداگوگيكالىق كەڭەستە.