الەكسەي سوي ۆاكسينا ءوندىرۋدى نەگە قاراعاندىداعى زاۋىتقا تاپسىرىلعانىن ءتۇسىندىردى
«الەۋمەتتىك جەلىدە بۇل ماسەلەنى قوزداتاتىندار كوپ. كەز كەلگەن ىستەن، بارلىق جەردە قانداي دا ءبىر استار، سەبەپ ىزدەپ جۇرەدى. مەن سىزگە ناقتى ايتايىن. تاڭداۋ نەگە قاراعاندىداعى فارماتسيەۆتيكالىق زاۋىتقا ءتۇستى؟ ويتكەنى قازاقستاندا بيولوگيالىق پرەپارات شىعاراتىن جالعىز زاۋىت سول. قازاقستاندا ءتۇرلى زاۋىتتار بار. ءبىراق ولار تابلەتكالار، حيميالىق زاتتار شىعارادى. ال ءتىرى بيولوگيالىق پرەپارات شىعاراتىن زاۋىت بىزدە بىرەۋ عانا. ول نارىقتا 5 جىلدان بەرى جۇمىس ىستەپ كەلەدى. ءبىز ولاردان وسى ىسكە اتسالىسۋدى ءوزىمىز سۇراعانبىز. ءتىپتى ماجبۇرلەگەندەي بولدىق»، - دەدى الەسەي سوي.
ءمينيستردىڭ مالىمەتىنشە، وعان دەيىن قاراعاندىداعى فارماتسيەۆتيكالىق زاۋىت ونكولوگياعا قاجەت بيولوگيالىق پرەپارات شىعارىپ تۇرعان.
«ءبىزدىڭ قازىر گامالەيا ينستيتۋتىنىڭ سۋبستانتسياسى نەگىزىندە ۆاكسينا جاساپ وتىرعانىمىز ساتتىلىك دەۋگە بولادى. قازىر الەم نارىعىندا ۆاكسينا ەركىن ساۋدادا جوق. سوندىقتان بۇل جەردە ەشقانداي كونسپيرولوگيالىق ىمىرالاسۋ جوق. ويتكەنى بيولوگيالىق پەرپارات شىعاراتىن جالعىز زاۋىت وسى. ەگەر بىرنەشە وسىنداي زاۋىت بولعاندا باسقا الاڭدى تاڭداۋىمىز دا مۇمكىن ەدى»، - دەدى ۆەدومستۆو باسشىسى.