قازاقستاندىق ۆاكسيناداعى كلينيكالىق سىناقتىڭ ءۇشىنشى ساتىسى قاشان اياقتالادى
«ءۇشىنشى ساتى جالعاسىپ جاتىر. بۇگىندە ءۇشىنشى ساتى سىناقتارى 90 پايىزعا اياقتالدى، سودان كەيىن ۋاقىتشا تىركەۋگە سايكەس مەديتسينالىق قولدانۋعا رۇقسات بەرىلدى. ءبىز العاشقى توپتاماسىن شىعاردىق. كۇنى كەشە عانا، 25-مامىردا ينستيتۋت قوسىمشا 50 مىڭ دوزانى «س ق فارماتسيا» حابتارىنا جونەلتتى»، - دەدى ول قازاقپارات تىلشىسىنە تەلەفون ارقىلى بەرگەن سۇقباتىندا.
ونىڭ اتاپ وتۋىنشە، كلينيكالىق سىناقتىڭ ءۇشىنشى ساتىسى ەلىمىزدىڭ دەنساۋلىق ساقتاۋ مينيسترلىگى بەكىتكەن حاتتاماعا سايكەس جۇرگىزىلىپ جاتىر.
«بۇگىندە اتالعان حاتتامادان اۋىتقۋ بولعان جوق. ءۇشىنشى ساتى وسى جىلدىڭ 9-شىلدەسىندە اياقتالادى. ءۇشىنشى ساتى اياقتالعاننان كەيىن مالىمەتتەرگە ۇلكەن ساراپتامالىق وڭدەۋ جۇرگىزىلەدى. بۇل اسقان دالدىكتى تالاپ ەتەتىن اۋىر پروتسەسس جانە شىلدە ايىنىڭ سوڭىندا زەرتتەۋدىڭ بارلىق ساتىسىنا قاتىستى قورىتىندى ەسەپ بولادى. ونى بەكىتىلگەن تارتىپپەن دەنساۋلىق ساقتاۋ مينيسترلىگىنە ۇسىنامىز»، - دەدى كۇنسۇلۋ زاكاريا.
اۆتور: مارلان جيەمباي