بۇل تۋرالى ەلباسىنىڭ باسپا ءسوز حاتشىسى ايدوس ۇكىباي ايتتى، دەپ حابارلايدى قازاقپارات ءتىلشىسى.
ونىڭ اتاپ وتۋىنشە، نۇرسۇلتان نازاربايەۆ وتىرىستار مەن جينالىستارعا قاتىسۋدان بولەك كەزدەسۋلەر، كەلىسسوزدەر وتكىزىپ، ءوز اتىنا كەلىپ تۇسەتىن كوررەسپوندەنتسيالار مەن قىزمەتتىك قۇجاتتاردى ءجىتى زەردەلەيدى.
«كوروناۆيرۋس ينفەكتسياسىنىڭ پاندەمياسى جۇمىس فورماتىنا بەلگىلى ءبىر تۇزەتۋلەر ەنگىزگەنىمەن جاۋاپكەرشىلىك تومەندەگەن ەمەس. ءتىپتى، پاندەميادان تۋىنداعان قازىرگى ءبىرشاما كۇردەلى جاعدايدا ەلباسى ءوزىنىڭ قۇزىرەتى اياسىندا الەۋمەتتىك- ەكونوميكالىق دامۋدىڭ جانە حالىقتىڭ قاۋىپسىزدىگىن قامتاماسىز ەتۋدىڭ ستراتەگيالىق ماسەلەلەرىنە باسا نازار اۋدارىپ وتىر»، - دەدى ەلباسىنىڭ باسپا ءسوز حاتشىسى.
ايدوس ۇكىبايدىڭ اتاپ وتۋىنشە، نۇرسۇلتان نازاربايەۆ الەمدىك كوشباسشىلارمەن، شەتەلدىك ساياساتكەرلەرمەن جانە ينۆەستورلارمەن ۇنەمى بايلانىسىپ وتىرادى. ولاردىڭ قاتارىندا ت م د ەلدەرىنىڭ باسشىلارى، تۇركى كەڭەسى مەن ش ى ۇ، ەۋروپالىق وداق، وپەك مۇشەلەرى، ە ق د ب، JP Morgan Chase International سەكىلدى ءىرى ينستيتۋتتاردىڭ وكىلدەرى بار.
«تەلەفون ارقىلى سويلەسۋ جانە جەكە كەزدەسۋلەر بارىسىندا تاراپتار الەمدەگى ەكونوميكالىق جانە ساياسي احۋالعا قاتىستى پىكىر الماسادى. ەلباسىدان كۇن تارتىبىندەگى جەكەلەگەن ماسەلەلەر بويىنشا كەڭەس سۇرايدى، بەلگىلى ءبىر پروبلەمانى شەشۋگە قاتىستى كوزقاراسىنا قىزىعۋشىلىق تانىتادى. ماسەلەن، بۇگىن نۇرسۇلتان نازاربايەۆقا اقش- تىڭ بۇرىنعى ۆيتسە- پرەزيدەنتى قوڭىراۋ شالدى. ەلباسى مەن البەرت گور الەمدىك دەرجاۆالار اراسىنداعى سەنىم داعدارىسى جانە سانكتسيالىق تەكە- تىرەستەرمەن بايلانىستى احۋالدى تالقىلادى»، - دەدى ول.
سونىمەن قاتار ەلباسىنىڭ يننوۆاتسيالار مەن الدىڭعى قاتارلى تەحنولوگيالار نارىعىن ۇنەمى زەردەلەپ وتىراتىندىعىن اتاپ ءوتتى.
«وعان تسيفرلاندىرۋ جانە جاساندى ينتەللەكتى قولدانۋ سالالارىنداعى جاڭا شەشىمدەر وتە قىزىقتى. ول ەلىمىزدە بەيىمدەلۋى مۇمكىن ءتۇرلى كەيستەردى دە زەردەلەيدى»، - دەدى ايدوس ۇكىباي.