اسقار مامين ق ر پرەزيدەنتىنە ەلدەگى الەۋمەتتىك- ەكونوميكالىق جاعداي تۋرالى ەسەپ بەردى

نۇر- سۇلتان. قازاقپارات – ق ر پرەزيدەنتى قاسىم- جومارت توقايەۆ پرەمەر- مينيستر اسقار ءماميندى قابىلدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

پرەزيدەنت قاسىم- جومارت توقايەۆقا ەلىمىزدەگى سانيتارلىق- ەپيدەميولوگيالىق جاعداي، حالىقتى ۆاكسينالاۋ، سونداي- اق، الەۋمەتتىك- ەكونوميكالىق دامۋدىڭ وزەكتى ماسەلەلەرى تۋرالى ەسەپ بەرىلدى.

پرەمەر- ءمينيستردىڭ ايتۋىنشا، ەلدەگى سانيتارلىق- ەپيدەميولوگيالىق جاعداي تۇراقتانعان. قازاقستان Covid-19 ىندەتىنىڭ تارالۋ قارقىنى بويىنشا «قىزىل» ايماقتان «سارى» ايماققا ءوتتى. ۆيرۋستىڭ جۇعۋ يندەكسى - 0,94. جۇقپالى اۋرۋلار بولىمشەلەرى - 33 پايىزعا، جان ساقتاۋ بولىمشەلەرى - 25 پايىزعا تولعان. ۆاكسينالاۋ قارقىنى ارتىپ كەلەدى. قازىرگى تاڭدا قازاقستاندا 3 ميلليون ادامعا ەكپە سالىنىپ، ونىڭ 2 ميلليونى ۆاكسينانىڭ ءبىرىنشى كومپونەنتىن العان. 1 ميلليونعا جۋىق ادامعا ەكپەنىڭ ەكىنشى كومپونەنتى سالىندى.

مەملەكەت باسشىسىنا 2021 -جىلعى جۇمىسپەن قامتۋ جول كارتاسى باعدارلاماسىنىڭ ورىندالۋ جوسپارى تۋرالى اقپارات بەرىلدى. اسقار مامين جۇمىسپەن قامتۋ جول كارتاسىن ىسكە اسىرۋعا بيىل 300 ميلليارد تەڭگە بولىنگەنىن، 35,6 مىڭ جۇمىس ورنى، ونىڭ ىشىندە، 20 مىڭنان استام تۇراقتى جۇمىس ورنى اشىلاتىنىن اتاپ ءوتتى.

قاسىم- جومارت توقايەۆقا مەملەكەتتىك قىزمەتشىلەرگە ەڭبەكاقى تولەۋ جۇيەسىنىڭ پيلوتتىق رەجيمىنىڭ جۇزەگە اسىرىلۋى جونىندە باياندالدى. اتالعان پيلوتتىق جوباعا 2018 -جىلى مەملەكەتتىك قىزمەت ىستەرى اگەنتتىگى، سىبايلاس جەمقورلىققا قارسى ءىس- قيمىل اگەنتتىگى، ادىلەت مينيسترلىگى، ءبىرقاتار ءوڭىردىڭ اكىمدىكتەرى قاتىستى. جۇرگىزىلگەن تاجىريبەنىڭ ناتيجەسىندە جوباعا قاتىسۋشى مەملەكەتتىك ورگانداردا كادرلاردىڭ الماسۋى 4,9 پايىزدان 3,5 پايىزعا دەيىن ازايىپ، مەملەكەتتىك قىزمەتتىڭ تارتىمدىلىعى ارتا ءتۇستى (كونكۋرس 1 ورىنعا 3,4 ەسەگە ارتتى)، ورتالىقتا جانە ايماقتاردا ەڭبەكاقى تولەۋ الشاقتىعى 70 پايىزدان 16 پايىزعا دەيىن قىسقاردى.

مەملەكەت باسشىسى اتالعان جوبانى جەرگىلىكتى اتقارۋشى ورگانداردا سونداي- اق، ورتالىق مەملەكەتتىك ورگانداردا اۋقىمدى تۇردە جۇزەگە اسىرۋدى تاپسىردى. سونىمەن قاتار مەملەكەتتىك قىزمەتشىلەردىڭ سانىن كەزەڭ- كەزەڭىمەن قىسقارتۋ جانە مەملەكەتتىك اپپاراتتىڭ ۇيىمدىق قۇرىلىمىن وڭتايلاندىرۋ جۇمىستارىن جالعاستىرۋ كەرەك.

پرەزيدەنت قۇرىلىمدى قايتا وزگەرتۋ ناتيجەسىندە ۇنەمدەلگەن قارجىنى ەڭبەكاقى كولەمىن ارتتىرۋعا باعىتتاۋ ماڭىزدى دەپ سانايدى. بۇدان بولەك كەزدەسۋدە سىرتقى جانە ىشكى ينۆەستيتسيالاردى تارتۋدى ۇلعايتۋ، شاعىن جانە ورتا بيزنەستىڭ الەۋەتىن ارتتىرۋ، قايتا وڭدەۋ سەكتورىنىڭ ءوسىمى مەن دامۋى ەسەبىنەن ەكونوميكانىڭ قۇرىلىمىن ودان ءارى ءارتاراپتاندىرۋ، ەلىمىزدىڭ الەۋمەتتىك- ەكونوميكالىق دامۋىنا قاتىستى باسقا دا وزەكتى ماسەلەلەر جونىندە قابىلدانعان شارالار قاراستىرىلدى.