نۇرلى جەر: ەرەيمەنتاۋ اۋدانىندا كوپ پاتەرلى ەكى تۇرعىن ءۇي سالىنىپ جاتىر

كوكشەتاۋ. قازاقپارات - اقمولا وبلىسىنىڭ ەرەيمەنتاۋ اۋدانىندا «نۇرلى جەر» باعدارلاماسىن جۇزەگە اسىرۋ اياسىندا ەكى جوبا جۇزەگە اسىرىلۋدا.

بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە اۋدان اكىمى اباي ءالجانوۆ ايتتى، دەپ حابارلايدى قازاقپارات ءتىلشىسى.

«ەرەيمەنتاۋ قالاسىندا 45 پاتەرلى جالعا بەرىلەتىن جانە 45 پاتەرلى كرەديتتىك تۇرعىن ءۇيدىڭ قۇرىلىسى ءجۇرىپ جاتىر. بۇل ۇيلەر 2020 -جىلدىڭ 11-مامىرىندا سالىنا باستاعان بولاتىن. بۇگىنگى كۇنى عيماراتتىڭ 5- قاباتىنىڭ قابىرعالارىن قالاۋ اياقتالىپ، پايدالانۋعا بەرۋ مەرزىمى 2021 -جىلدىڭ شىلدە ايىنا جوسپارلانىپ وتىر»، - دەدى اۋدان اكىمى.

سونىمەن بىرگە، 2020 -جىلى ەرەيمەنتاۋ قالاسىندا قۇنى 614 ميلليون تەڭگەگە 60 پاتەرلى (جالعا بەرىلەتىن) كوممۋنالدىق تۇرعىن ءۇيدىڭ قۇرىلىسى باستالدى. قازىرگى كەزدە جوبانى انىقتاۋ ءۇشىن 522,2 ميلليون تەڭگە قارجى قاجەت.

ايتا كەتەيىك، اقمولا وبلىسىندا باسپاناعا مۇقتاج ازاماتتار ءۇشىن جالعا بەرىلەتىن تۇرعىن ءۇي قۇرىلىسى قارقىن العان. جالپى ءوڭىر بويىنشا بيىل جالعا بەرىلەتىن 37 تۇرعىن ءۇيدىڭ قۇرىلىسى ءجۇرىپ جاتىر.