تۇركىستاندا ەلباسىنا ەسكەرتكىش ورناتۋ كەرەك - تۇرىكسويدىڭ باس حاتشىسى
كونفەرەنسيانىڭ مودەراتورى ح. ا. ياسساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ ۆيتسە-پرەزيدەنتى جەنگيز تومار بولدى، دەپ حابارلايدى قازاقپارات.
«قازاقستاننىڭ تۇڭعىش پرەزيدەنتى تۇركى ەلدەرىنىڭ تۇتاستىعىنىڭ نىعايۋى مەن دامۋىنا ۇلكەن ۇلەس قوستى. وسىدان ءۇش جىل بۇرىن نۇرسۇلتان ءابىش ۇلىنىڭ تاريحي جارلىعىمەن تۇركىستان وبلىسى قۇرىلدى، تۇركىستان قالاسى وبلىس ورتالىعىنا اينالدى. ۇلت كوشباسشىسىنىڭ ەرەكشە جارلىعى تەك قانا قازاقستان ءۇشىن ەمەس، سونىمەن قاتار بارلىق تۇركى الەمى ءۇشىن تاريحي وقيعا بولدى. وسى كەزدەن باستاپ قالا ەرەكشە قارقىنمەن دامىپ كەلەدى. ءۇش جىلدىڭ ىشىندە تۇركىستان تەك قانا تۇركى الەمىنە ەمەس، ونىڭ شەكاراسىندا دا تانىلىپ ۇلگەردى. ەجەلگى قالا ءوزىنىڭ تاريحي سيپاتىن ساقتاي وتىرىپ، زامانىنا ساي دامي باستادى. جوعارىدا اتالعاندارمەن بايلانىستى تۇركى الەمىنىڭ رۋحاني استاناسى تۇركىستاننىڭ ورتالىعىندا قالانىڭ قايتا جاندانۋىنا سەبەپ بولعان، سونىمەن قاتار تۇركى ىقپالداستىعى يدەياسىن جۇزەگە اسىرۋعا باعا جەتپەس ۇلەس قوسقان نۇرسۇلتان ءابىش ۇلى نازاربايەۆقا ەسكەرتكىش ورناتۋعا شاقىرامىن. بۇل ءۇشىن كوپتەگەن نەگىز بار. بۇل وي مەملەكەت باسشىسى بولا وتىرىپ، تۇركى ەلدەرىنىڭ بىرىگۋىنە ىقپال ەتكەن، قازاق حالقىنىڭ گۇلدەنۋى مەن تىنىشتىعىنا، ونىڭ تاۋەلسىزدىگىنە ۇمتىلعان تۇركى الەمىنىڭ دانىشپان اقساقالىنا دەگەن ەرەكشە قۇرمەتتەن تۋىپ وتىر. مەن بارلىق سانالى ازاماتتاردىڭ بۇل باستامانى قولدايتىنىنا سەنىمدىمىن»، - دەدى بيلال چاكىدجي.
كونفەرەنسيا قاتىسۋشىلارى شەتەلدىك عالىمنىڭ ۇسىنىسىن ءبىراۋىزدان قولدادى. سونىمەن قاتار ەلباسىنىڭ تۇركى الەمىنىڭ دامۋىنا قوسقان ەرەكشە ۇلەسىنە العىسىن ءبىلدىردى.
ونلاين- كەزدەسۋگە تۇركىتىلدەس مەملەكەتتەر ىنتىماقتاستىعى كەڭەسىنىڭ (تۇركى كەڭەسى) باس حاتشىسى باعداد امرەيەۆ، تۇركىتىلدەس ەلدەردىڭ پارلامەنتتىك اسسامبلەياسىنىڭ باس حاتشىسى (تۇركپا) ءالي يىلدىز، حالىقارالىق تۇركى اكادەمياسىنىڭ پرەزيدەنتى دارحان قىدىرالى، تۇرىكسويدىڭ باس حاتشىسى بيلال چاكىدجي، Nur Otan پارتياسىنىڭ حاتشىسى ارمان قىرىقبايەۆ، ح. ا. ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ وكىلەتتى كەڭەسىنىڭ ءتوراعاسى، دوكتور، پروفەسسور مۋحيتتين شيمشەك، تاتارستان رەسپۋبليكاسىنىڭ ەكس-پرەزيدەنتى مينتيمەر شايميەۆ، باشقۇرتستان رەسپۋبليكاسىنىڭ ەكس- پرەزيدەنتى مۇرتازا راحيموۆ، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى دارحان مىڭباي، نازاربايەۆ ۋنيۆەرسيتەتىنىڭ پروفەسسورى يۋلاي شاميلوگلى قاتىستى.
ەسكە سالا كەتەيىك، ونلاين- كەزدەسۋدىڭ نەگىزگى ماقساتى - وسى جىلدىڭ 31-مامىرىندا وتكەن تۇركىتىلدەس مەملەكەتتەر ىنتىماقتاستىعى كەڭەسىنىڭ بەيرەسمي سامميتىندە تۇركىستان قالاسىن تۇركى الەمىنىڭ رۋحاني استاناسى ەتىپ جاريالاۋمەن بايلانىستى ماڭىزدى شەشىمدەردى جۇزەگە اسىرۋ.
اۆتور: ءبيبىحان سەرىكوۆا