انگلياداعى قانداستارىمىز قازاق ءتىلىن ونلاين ۇيرەنىپ ءجۇر
قاتىسۋشىلارى قىم- قۋىت زاماندا تاعدىردىڭ تالكەگىنە ۇشىراپ، قازاقستاننان كوشىپ كەتكەن قارا كوزدەرىمىز. كۋرس تەك ءتىلدى عانا ەمەس، ۇلتتىق سالت- داستۇرلەرىمىزدى جانە مادەنيەتىمىزدى ۇمىتتىرماۋعا باعىتتالعان. قاتىسۋشىلاردىڭ جالپى سانى 60 قا جۋىق، دەپ حابارلايدى قازاقپارات ءتىلشىسى.
«دۇنيەجۇزى بويىنشا بارلىق قازاقتاردى قامتىپ وتىرعان كۋرس. قازىرگى تاڭدا انگليادان، موڭعوليادان، وزبەكستاننان، ازەربايجاننان، كوبىنە تۇركيادان قاتىسىپ جۇرگەن ءتىل ۇيرەنۋشىلەرىمىز بار»، دەيدى تالىمگەر ءلاززات بيسەنبايەۆا.
كۋرس تىڭداۋشىلارىنىڭ ءبىرى بريتانيالىق قازاقتاردىڭ باسىن بىرىكتىرەتىن قاۋىمداستىق ءتوراعاسى ءابدىسالىم ساۆاش. ونىڭ اكە- شەشەسى زۇلمات جىلدارى التاي وڭىرلەرىنەن تۇركياعا كوشىپ كەتكەن. ال ءوزى 25 جاسىندا تۇركيادان ۇلى بريتانياعا قونىس اۋدارعان. الپىستى القىمداعان اقساقالدىڭ 5 بالاسى بار. بۇگىن جۇبايى جانە قۇداعايىمەن بىرگە ۇمىتقانىن جاڭعىرتىپ، ءتىل ۇيرەنىپ جاتىر.
«ءبىزدىڭ قازاقشامىز اكە- شەشەمىزدەن ەستىپ- ۇيرەنگەن شالا قازاقشا. قازىر انا ءتىلىمىزدى مەڭگەرىپ، دامىتىپ جاتىرمىز، قۇدايعا شۇكىر. ەندى مىنا كوروناۆيرۋس بىتسە، دەمالىس كۇندەرى جاستاردى جيناپ، ينتەرنەت ارقىلى بايلانىسىپ، قاۋىمداستىعىمىز ءۇشىن ۇيىمنەن بولىنگەن بولمەدە ءتىلدى ۇيرەنۋگە تىرىسامىز»، دەيدى ءابدىسالىم اقساقال.
بولمەدە قازاقستاننىڭ تۋىنان باستاپ، ۇلتتىق كيىمدەرگە دەيىن بار. ۇلتتىق اسپاپتا ويناپ، سالت- داستۇرلەردى جاڭعىرتۋعا دا بارلىق جاعداي جاسالعان. ءبىرىنشى جانە ەكىنشى جالپىۇلتتىق لوكداۋندار كەزىندە ۇلى بريتانياداعى قانداستارىمىزدىڭ جانە ەلدە ۋاقىتشا تۇرىپ جاتقان وتانداستارىمىزدىڭ باسىن قوسۋ مۇمكىن بولماعان. شەكتەۋلەردىڭ جەڭىلدەتىلۋىنە بايلانىستى ولاردىڭ كەيبىرىن داستارحان باسىندا جيناۋدىڭ بۇگىن ءساتى ءتۇسىپ وتىر.
«ارىس قالاسىنىڭ تۋماسىمىن. لوندوندا 2010-جىلدان بەرى جۇبايىمىز ەكەۋمىز تۇرامىز. وسىندا مۇناي- گاز سالاسىندا جۇمىس ىستەيمىن. ءوزىمىز ەندى سىرتتا جۇرگەننەن كەيىن انا تىلىمىزدە سويلەسۋگە ادام تاپپاي قالامىز كەيدە. نەگىزى، جۇمىس اعىلشىن تىلىندە جۇرگىزىلگەننەن كەيىن قازاقشا سويلەسپەسەڭ دە ۇمىتا باستايسىڭ ءتىلدى»، دەيدى لوندون قازاعى، ينجەنەر داۋلەت ەسەناليەۆ.
ۇلى بريتانيا قازاقتارى قاۋىمداستىعىنىڭ مۇشەلەرى الداعى ۋاقىتتا دومبىرا تارتۋدى دا ونلاين ۇيرەنۋدى كوزدەپ وتىر. وسىلايشا ەلدەن جىراقتا جۇرگەن قانداستارىمىزدىڭ ۇلتتىق دۇنيەتانىم شەڭبەرى كەڭەيە تۇسەدى دەگەن زور سەنىم بار.