سىر وڭىرىندە اراق- شاراپ ساتىلمايتىن اۋىل بار
مىڭنان استام تۇرعىنى بار جيدەلىارىق اۋىلىنداعى دۇكەندەر اشى سۋدى ساتۋدان باس تارتقان. ەسەسىنە ەلدى مەكەندە سوڭعى 1,5 -جىلدا قىلمىس تىركەلمەگەن.
«بۇل - اۋىل اقساقالدارى مەن پوليسەيلەردىڭ بىرلەسە اتقارعان جۇيەلى جۇمىسىنىڭ جەمىسى»، - دەيدى تۇرعىندار. جيدەلىارىق اۋىلىنا كىرگەن بويدا، العاش ۇشىراسقان تۇرعىننان «اۋىلدا اراق- شاراپ ساتىلا ما؟ « دەپ سۇرادىق. بىزگە كەزىككەن اسىلحان سادەنوۆ قازاقتىڭ داستۇرىمەن ءدام ۇسىنا وتىرىپ، اۋىلداستارىنىڭ اشى سۋدى ەمەس، اعارعاندى كوپ ىشەتىنىن ماقتانىشپەن ايتىپ بەردى. ءوزى كوشە جاستارىنىڭ تارتىبىنە دە جاۋاپتى ەكەن.
اسىلحان سادەنوۆ، جيدەلىارىق اۋىلىنىڭ تۇرعىنى:
- مىسالى، ەكى ادام مىنا كوشەگە قارايمىز، مەن سولاردىڭ ءبىرىمىن. كەلەسى كوشەگە ءبىر- ەكى ادام قويىپ قويعان، ءار كوشەگە سولاي. بالالار ءتارتىپ بۇزسا، قوقىس شاشسا، ونىڭ دۇرىس ەمەستىگىن ايتىپ ەسكەرتەمىز.
اۋىلداعى دۇكەندەردى ارالادىق. راسىندا الكوگول جوق. ءتىپتى ءبىر دۇكەن يەسى تەمەكى دە ساتپايتىنىن ايتتى.
بيبايشا ىسقاقوۆا، جەكە كاسىپكەر:
- بىلاي سىرت جەرلەردە ماقتانامىن، «ءبىزدىڭ اۋىلدا اراق ءىشىپ، قيساڭداعان، ۇرىس- توبەلەسشىعارىپ جاتقان ەشكىم جوق» دەپ. سىرتتان كەلگەن جۇمىسشىلار تەمەكى سۇرايدى. «تەمەكى ساتپايمىن» دەيمىن. «ءوي، تەمەكى ساتپايتىن قانداي دۇكەن» دەپ كەتەدى.
جيدەلىارىقتا سوڭعى 1,5 جىل كولەمىندە ءبىر دە ءبىر قىلمىس بولماعان. اۋىلدا «ساقشى- سارباز» بىرلەستىگى بار. ولار كۇن سايىن ەلدى مەكەننىڭ ءىشى- سىرتىن ارالاپ، احۋالدى قاداعالايدى ەكەن. «اقساقالدار دا اقىل- كەڭەسىن ايتىپ وتىرادى»، - دەيدى ۋچاسكەلىك پوليتسيا ينسپەكتورى توقتارباي دۋلاتوۆ.
توقتارباي دۋلاتوۆ، ۋچاسكەلىك پوليتسيا ينسپەكتورى:
- اۋىلدىڭ اقساقالدارىمەن تىعىز بايلانىستامىز. اۋىلدىڭ احۋالىن مەكتەپكە ءاردايىم توقسانىنا ءبىر رەت جينالىس وتكىزىپ، جاسوسپىرىمدەردىڭ قىلمىسىنىڭ الدىن الۋ ماقساتىندا. تاعى باسقا سونداي تۇسىندىرمە جۇمىستارى جۇرگىزىلەدى.
ىشىمدىك ساتىلماسا، جاستار جامان ادەتكە ءۇيىر بولمايدى. بوس ۋاقىتتارىن سالاۋاتتى شارالارعا ارناپ، پايدالى ىسپەن اينالىسادى. «بۇل جاس بۋىننىڭ بولاشاعى ءۇشىن ماڭىزدى»، - دەيدى اۋىلدىقتار.