قىتايلارعا قازاق ءبيىن ۇيرەتىپ جۇرگەن ءبيشى قىز - شەتەلدەگى قازاق ءتىلدى ب ا ق- قا شولۋ
گاۋھار باقىت قىزى: مەن الەمدى بي ارقىلى تۇسىنەمىن - CNR
قىتايلىق kazakcnr.com سايتىندا قىتايدىڭ تەڭىز جاعالاۋىنداعى شىنجىن قالاسىندا جەكە بي ستۋدياسىن اشقان قانداسىمىز ءبيشى گاۋھار باقىت قىزىنىڭ سۇحباتتى جارىق كوردى.
«شىنجىن قالاسى (Shēnzhèn) - قىتايداعى العاشقى قۇرىلعان ارنايى ەكونوميكالىق ايماق. ول قازىرگى تاڭدا دامىپ كەلە جاتقان، ءىرى قالالاردىڭ ءبىرى. ايتسەدە وسى ەكونوميكاسى قارقىندى دامىعان، زامانعا ساي بوي تۇزەگەن جاڭا قالانىڭ ۇلتتىق مادەنيەت پەن داستۇردەن الشاقتاي تۇسكەنى انىق بايقالادى. سوندىقتان ەل اۋزىندا بۇل قالانىڭ «مادەنيەت ءشولى» دەگەن اتى بار. مىنە وسىنداي جاھاندىق ۇردىسكە جۇتىلىپ، ادامزاتتىڭ ءتول مادەنيەتىنەن الشاقتاي تۇسكەن الىپ قالادا جەكە بي ستۋدياسىن اشىپ، «مادەنيەت گۇلىن» ەگىپ جۇرگەن قازاق قىزىنىڭ ەڭبەگى زور»، - دەپ جازدى CNR.
اتالعان ب ا ق- تىڭ دەرەگىنشە، قازىرگى كۇنى شىنجىن قالاسىندا تۇرىپ جاتقان گاۋھار باقىت قىزى قىتايدىڭ التاي ايماعىنىڭ تۋماسى. 2014 -جىلى بەيجىڭدەگى ورتالىق ۇلتتار ۋنيۆەرسيتەتىنىڭ بي اكادەمياسىن بىتىرگەن. ول شىڭجاڭ بيشىلەرى وداعىنىڭ جانە شىنجىن بيشىلەرى وداعىنىڭ مۇشەسى. شىڭجاڭ ءان- بي انسامبلىندە ءبيشى بولعان. گاۋھار 2014 -جىلى حۋح- حوتو قالاسىندا وتكەن قىتايدا تۇراتىن سانى از ۇلتتاردىڭ بي فەستيۆالىنە قاتىسىپ، باس جۇلدەنى جەڭىپ العان. سونىمەن بىرگە 11- قىتاي ونەر فەستيۆالىنىڭ، 15- «ۆەنحۋا سىيلىعىنىڭ»، «تيانشانداعى ماحاببات» سپەكتاكلى قويىلىمنىڭ التىن مەدالدارىن قانجىعالاعان.
گاۋھار باقىت قىزى 2016، 2017 -جىلدارى قازاقستان، وزبەكستان، ماكاو، ءۇندىستان، بۋتان جانە باسقادا كوپتەگەن ەلدەرگە ونەر ساپارىمەن بارىپ قازاقتىڭ ءبيىن بيلەپ، الەمگە ناسيحاتتاعان. سونداي- اق، ءبيشىنىڭ قازاقتىڭ ۇلتتىق بي ونەرى تۋرالى قاۋزاعان ماقالالارى قىتايداعى بەلگىلى باسىلىمداردا جارىق كورگەن.
«بي مەن ءۇشىن ارمان- تىلەك، تاۋەلدىلىك، تاباندىلىق، ىزدەنىس جولىم. مەنىڭ الەمدى تانىپ، قابىلدايتىن ەڭ ۇلكەن تەرەزەم. سوندىقتان مەن الەمدى بي ارقىلى تۇسىنەمىن دەپ ايتامىن. ءوزىم كىشكەنتاي كەزىمنەن بيلەگەندى ۇناتام. بي ۇيىرمەلەرىندە تاربيەلەندىم. مەن وسى ۋاقىتقا دەيىن ۇلتىمىزدىڭ بي ونەرىن وزگە جۇرتقا تانىتسام، تاماشالاتسام دەپ ماقسات قويدىم. ونەر ساپارىمەن الەم ەلدەرىن ارالاعاندا كوبىنەسە «قارا جورعا» ءبيىن بيلەپ شىعاتىنمىن. سوندا كورەمەن ەرەكشە قىزىعىپ، قايتالاپ بيلەۋگە ۇسىنىس جاسايتىن»، - دەيدى گاۋھار باقىت قىزى.
سونىمەن بىرگە ءبيشى سۇحباتىندا شىنجىن قالاسىنداعى بي ستۋدياسىنىڭ قالاي جۇمىس ىستەپ جاتقانى تۋرالى ايتىپ بەرگەن.
«ءبىز بالا كۇنىمىزدەن قازاقتىڭ تويى مەن ءتۇرلى مەرەكەسىندەگى ءان مەن ءبيدى كورىپ وستىك. بۇل ورتا ءبىزدى مادەنيەتتى ، ونەردى تانىپ- بىلۋگە، ونى جاقسى كورىپ، اۋەستەنۋگە ۇيرەتتى. ال مىنا شىنجىن سەكىلدى الەمدىك فينانسى، ەكونوميكا، ساۋدانىڭ ورتالعى سانالاتىن قالادا ادامداردىڭ ءومىرى تىم قاربالاس ءوتىپ جاتىر. مەنىڭ شاكىرتتەرىم وسىندا كەلگەندە بي ۇيرەنىپ، سونىمەن بىرگە دەمالىپ، سەرگىپ قالادى. شىنجىن قالاسى گونكونگقا جاقىن ورىنالاسقان. سوندىقتان بولار ادامدار ەۋروپا مادەنيەتىن كوبىرەك قابىلداپ جاتادى. سوعان قاراماستان مەنىڭ شاكىرتتەرىمنىڭ اراسىندا قازاقتىڭ «قارا جورعا» ءبيىن ءوز بولمىسىمەن بيلەيتىن ءبيشى قىز بار. ءبيدى ۇيرەنۋ بارىسىندا قيىندىق بولدى. مەندە، شاكىرتىمدە سول قيىندىقتاردى جەڭىپ، ۇلكەن قۇلشىنىسپەن، قاجىرلى ەڭبەكپەن ءساتتى ۇيرەنىپ شىقتىق. سونىڭ ارقاسىندا حۋنان تەلەارناسى ۇيىمداستىرعان الامان بي بايقاۋىندا سول قىتاي ۇلتىنىڭ 10 جاستاعى قىزى «قارا جورعا» ءبيىن بيلەپ جۇلدەگەر اتاندى»، - دەيدى ءبيشى گاۋھار باقىت قىزى.
موڭعوليا و س ك حالىقارالىق ۇيىمداردى پرەزيدەنت سايلاۋىنا شاقىردى - - KAZNEWS
موڭعوليا وسك ەلدەگى پرەزيدەنت سايلاۋىنا باقىلاۋ جاساۋ ءۇشىن ەۋرووداققا مۇشە ەلدەرمەن ءبىرقاتار حالىقارالىق ۇيىمدارعا رەسمي تۇردە شاقىرتۋ جولدادى، دەپ جازادى موڭعوليانىڭ Kaznews اقپاراتتىق پورتالى.
«بۇعان دەيىن ەۋروپاداعى قاۋىپسىزدىك جانە ىنتىماقتاستىق ۇيىمى (ە ق ى ۇ) - نىڭ دەموكراتيا ينستيتۋتى مەن ادام قۇقىعى جونىندەگى قىزمەتى موڭعوليادا وتەتىن پرەزيدەنت سايلاۋىنا باقىلاۋ جاسايتىنىن حابارلاعان. موڭعوليادا پرەزيدەنت سايلاۋى 9 -ماۋسىم كۇنى وتكىزىلەدى»، - دەپ جازدى Kaznews.
وزبەكستاندا «جاڭا وزبەكستان» اتتى ءبىلىم ورداسى اشىلادى - «ءو ز ا» اقپاراتتىق اگەنتتىگى
پرەزيدەنت مەكتەبىن بىتىرگەن تۇلەكتەرى ءۇشىن «جاڭا وزبەكستان» جوعارى وقۋ ورنى اشىلادى، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.
اتالعان ب ا ق- تىڭ جازۋىنشا، وزبەكستان پرەمەر- ءمينيسترىنىڭ ورىنباسارى بەحزود مۋسايەۆ جاستارمەن سۇحبات بارىسىندا، الداعى ۋاقىتتا وزبەكستانداعى ءبىلىم نارىعى تاعى ءبىر ۇزدىك وقۋ ورنىمەن تولىعاتىنى جايلى ايتقان. جاستارمەن كەزدەسۋدە «جاڭا وزبەكستان» ۋنيۆەرسيتەتىندە بىلىكتى ماماندار، الەۋەتتى وقىتۋشىلاردى جانە شەتەلدەن ىقپالدى كادرلاردى تارتۋ جايلى مالىمەتتەر ايتىلعان.
«2021 -جىلدىڭ 1-قىركۇيەگىنەن باستاپ پرەزيدەنتتىك مەكتەپتەر ەلدىڭ بارلىق ايماقتارىندا جۇمىس ىستەي باستايدى. مۇندا ءبىلىم بەرۋ مەتوديكاسى كەمبريدجدىڭ ءبىلىم بەرۋ جۇيەسىنە نەگىزدەلگەن. مەملەكەت باسشىسى وسى مەكتەپتەرگە بارعاندا ماسەلەنىڭ ەكىنشى جاعىن قاراستىرىپ، سۇراق قويدى: كەمبريدج ءبىلىم بەرۋ جۇيەسىن بىتىرگەن بالالار قايدا وقيدى؟ وسى ماقساتتا وزبەكستاندا «جاڭا وزبەكستان» ۋنيۆەرسيتەتىن قۇرۋ بويىنشا العاشقى قادامدار جاسالدى»، - دەدى مۋسايەۆ سۇحبات بارىسىندا.
شەنتوپ نىعماتۋلينمەن تەلەفوندا سويلەستى - TRT
تۇركيا ۇلى ۇلتتىق ءماجىلىسىنىڭ ءتوراعاسى مۇستافا شەنتوپ قازاقستان ءماجىلىسىنىڭ ءتوراعاسى نۇرلان نىعماتۋلينمەن تەلەفون ارقىلى سويلەستى، دەپ حابارلايدى تۇركيا راديو تەليەۆيزيا پورتالى.
اتالعان ب ا ق- تىڭ جازۋىنشا، اڭگىمە بارىسىندا مۇستافا شەنتوپ باۋىرلاس جانە دوس قازاقستاننىڭ تۇرىك ۇلتى ءۇشىن ەرەكشە ەكەنىن ايتقان.
«كوۆيد-19 ىندەتىنە قارسى قازاقستاندىق ۆاكتسينانىڭ ءساۋىردىڭ سوڭىندا قولدانىسقا بەرىلگەنىن جانە وسى ۆاكسينانىڭ ءبىر ءبولىمى تۇركيادا قۇتىلارعا قۇيىلاتىنىن ەستىدىم. وسى سالاداعى تابىستارىڭىزبەن شىنايى قۇتتىقتايمىن. قارىم- قاتىناستارىمىزدى بەكەمدەي ءتۇسۋ ءۇشىن پرەزيدەنتتەرىمىزدىڭ، ءبىزدىڭ ءار ورەدە شەشىمدىلىك كورسەتۋىمىز ماڭىزدى»، - دەيدى مۇستافا شەنتوپ.
ال قازاقستان ءماجىلىس ءتوراعاسى نۇرلان نىعماتۋلين اڭگىمە بارسىندا، تۇركيا مەن قازاقستان اراسىندا عاسىرلىق تاريحي بايلانىستار بولعانىن ەسكە سالىپ، مۇستافا شەنتوپتى كۇز ايلارىندا ءوتۋى جوسپارلانعان تۇركى تىلدەس ەلدەر پارلامەنتتىك اسسامبلەياسىنىڭ (تۇرىك پ ا) 10- جالپى كەڭەس جينالىسىنا قاتىسۋ ءۇشىن قازاقستانعا شاقىرعان.
اۆتور: باقىتجول كاكەش